चिनियाँ सीमाय्२० अर्बया सामान थानाच्वन

येँ- चीनं नेपाः आयात यानातःगु करिब २० अर्ब तका बराबरया थीथी सामान थौंकन्हय् नेपाः–चीन नाकाय् थानाच्वंगु खँ व्यवसायीतय्सं धाःगु दु । चीनय् न्यना वंगु कोराना भाइरसया कारणं थ्व सामान नेपाः दुत महसे नाकाय् तुं थाका तःगु खः । सीमापार वाणिज्य संघं धाः कथं थौंकन्हय् चीनया खासा व केरुङ लगायत मेमेगु नं थीथी थासय् यानाः सामान लोड यानातःगु करिब १ हजार गः कन्टेनर थानाच्वंगु दु । चीनय् कोरोना भाइरस न्यना वनेवं अनं दुहां वःगु सामानपाखें समेत कोरोना सरे जुइफु धइगु आशंकां यानाः थ्व सामान नेपाः दुमकासें तयातःगु खः ।

व्यापारीतय्सं धाःसा चीनय् कोरोना न्यना वने स्वयां न्ह्यः अर्थात चिनियाँ न्हूदँया इलय् अर्डर यानातःगु सामान हे आः वयाच्वंगु जूगुलिं थुकियात पनेम्वाःगु तर्क तःगु दु ।

आः रोके जुयाच्वंगु सामानत मध्ये आपालं कन्टेनगरय् स्याउ, लाभा थेंज्याःगु सामान नं दुगुलिं तुरुन्त महल धाःसा थज्याःगु सामान ध्वगिना वने फुगु खँ धाःगु दु । फुक्कं यायेबलय् नाकाय् थौंकन्हय् १५ निसें २० अर्ब तकाया सामान थानाच्वंगु दयेमाः धइगु अनुमान व्यापार संघं याःगु दु ।

थ्व सामान खुले याना बी माल धकाः व्यापारीतय्सं वाणिज्य मन्त्रालयय् पौ हे बियाः इनाप यायेधुंकूगु दु । तर मन्त्रालयपाखें धाःसा उकियात कयाः छुं निर्णय याःगु मदुनि । अथे खःसां व्यापारीतय् पौयात कयाः मन्त्रालय दुने सामान्य सहलह धाःसा जुइधुंकूगु खँ सीदुगु दु । थौंकन्हय् विश्वव्यापी जुयाच्वंगु ल्वय्या खँ दुगु जुयाः थुकिया बारे वाणिज्य मन्त्रालय याकःचां जक निर्णय याये मफइगु खँ मन्त्रालय सूत्रं धाःगु दु ।
थुकिया बारे स्वास्थ्य, गृह लगायत राष्ट्र संघीय निकायतलिसे समेत खँल्हाबल्हा यानाः जक निर्णय याये फइगु खँ नं सूत्रं धाःगु दु ।
चीनं सामान हयेबलय् उकियापाखे छु गज्याःगु जोखिम वइ धइगु खँया पूवंक अध्ययन यानाः जक सामान हये बी फइगु खँ नं धाःगु दु ।
व्यापारीतय्सं सामान खोले यायेत इनाप याःसां मन्त्रालय धाःसा निर्णय यायेगु अवस्था मदुगुलिं थ्व सम्बन्धी अन्यौल अझ हे मेगु छुं न्हि कायम जुइगु खँ धाःगु दु ।

सम्बन्धित बुखँ

LEAVE YOUR COMMENTS