ख्वपय् माधवनारायण धलं

येँ (नेपालभाषा टाइम्स)÷ थनया खोह्रं (हनुमानघाट) स्थित त्रिवेणीधामय् म्हिगःनिसें माधव नारायण मेलाया धलं दनेगु शुरु जुल । थन माघया ख्वाउँया वास्ता मयासे मचांनिसें बुराबुरि तकं ख्वाउँगु लखय् म्वःल्हुयाः धलं दनेगु याइ । थन त्रिवेणीधामय् म्वःल्हुयाः सुद्र्यःयात अघ्र्य बियाः नारायणया पुजा यानाःलि धलं दनेगु शुरु जूगु खँ व्रतालु विनोद प्रजापतिं कनादिल । अन म्हिगः १४ म्ह मिसा मिजंपिंसं म्वः ल्हुयाः व्रत शुरु याःगु खः ।

थ्व थासय् सक्वया शाली खुसिइ स्वयां नं न्ह्यवंनिसें मेला व धलं दनेगु चलन दुगु खँ संस्कृतिकर्मी गुरु परमानन्द जोशीं कनादीगु दु । माधवनारायणया धलं दने छन्हु न्ह्यः निराहार च्वने माःगु, सुथंनिसें त्रिवेणीइ म्वःल्हुयाः नीसी यानाः जल छानाः पुज्यायेमाःगु चलन दु । नेसं ७२२ स रणजीत मल्ल थम्हं हे व्रतया व्यवस्थापन याःगु विवरण शिलालेखय् दुगु खँ कनादिसें जोशीं थनया त्रिवेणीघाटय् डुबे जुयाः एकचित्त जुयाः फ्वंगु मनोकांक्षा पूवनीगु जनविश्वास दुगु खँ कनादिल ।

धलं दंपिंसं खाली तुतिं हे न्यासि वनाः तिलमाधवंनिसें तलेजु भवानी तक, सप्तमी कुन्हु पन्ति वनाः त्रिवेणीइ म्वःल्हुयाः इन्द्रेश्वर महाद्यःया दर्शन यानाः अष्टमी कुन्हु लिहां वइगु, दशमी कुन्हु पशुपति वनाः म्वःल्हुयाः जयवागेश्वरी ताम्रेश्वर महाद्यःया कलश यात्रा यायेगु, द्वादशी कुन्हु कलश ज्वनाः चाँगुनारायणया दर्शन यायेगु व माघ शुक्ल पुन्हि कुन्हु देय् चाःहिलाः भूपतिन्द्र मल्लया मूर्तिइ इन्द्रकलश छानाः लछियंकं न्ह्याःगु धलं क्वचायेकीगु चलन दु ।