बीरगंजय् स्वम्ह भारतीयतय् कोरोना रिपोर्ट शंकास्पद

येँ – बीरंगजय् स्वम्ह भारतीय मुस्मां धर्मप्रचारकतय् स्वाब परिक्षणया रिपोर्ट शंकास्पद खनेदयेवं थप परिक्षण यायेत येँया राष्ट्रिय जनस्वास्थ्य प्रयोगशालाय् हःगु दु ।

बिहिवाः बाराया छपकैया व घुसुकपुर मस्जिदय् च्वनाच्वंपिं २४ म्ह भारतीय धर्मप्रचारक नारायणी अस्पतालय् स्क्रिनिङया निंतिं वःगु खः ।

नारायणी अस्पतालय् स्वाब लिकयाः परीक्षणया निंतिं हेटौंडाय् यंकूगु खः । हेटौंडाय् यानास्वःगु परीक्षणय् स्वम्हेसिया रिपोर्ट शंकास्पद वयेवं थप परीक्षणया निंतिं येँय् छ्वयाहःगु खः ।

हेटौंडा यानास्वःगु परीक्षणय् कोरोना दुगु नं धायेमफुगु मदुगु नं धायेमफुगु जुइवं थप परीक्षणया निंतिं येँय् छ्वयाहःगु खः ।

शंकास्पद रिपोर्ट वःपिं स्वम्हेसित धाःसा आः मस्जिदं लिकया हयाः नारायण अस्पतालया आइसोलेसनय् तयेहःगु दु । उमिगु रिपोर्ट शनिवाः हे वइगु खँ धाःगु दु । उमिसं धाःसा थःपिं प्यला न्ह्यव हे नेपाः दुहां वयागु खँ धाःगु दु । तर नारायणी अस्पतालया चिकित्सकतय्सं धाःसा उमिगु मखुगु खँ ल्हाःगु जुइफु धाःगु दु । स्थानीयतय्सं नं उपिं गुन्हु झिन्हु न्ह्यव जक मस्जिदय् थ्यंकःवःगु खँ धयाच्वंगु दु ।