आः बाजंया नापनापं भाषा नं स्यनीगु

येँ(नेपालभाषा टाइम्स)- पिने पिने जिल्लाय् बाजं स्यं वनीपिं बाजं गुरुपिंसं अन बाजंया नापनापं नेवाः भाय् नं स्यना वये फयेमा धकाः बाजं गुरुपिंत बिउगु भाषा स्यनेगु प्रशिक्षण म्हिगः क्वचाल ।

नेवाः देय् दबूया आह्वानय् नासः सृष्टि कलाया ग्वाहालिं नेवाः स्यनामि दबूपाखें स्वन्हुयंकं थ्व तालिम बिउगु खः । थनया नेपाल आदर्श स्कुलय् जूगु तालिमया नीम्ह सहभागीपिंत नेवाः देय् दबूया नायः पबित्र बज्राचार्यं दसिपौ लःल्हानादिल । ज्याझ्वलय् न्ववासें वय्कलं तालिम कयादीपिं सकसिनं आः अभियन्ता हे जुयाः भाषा प्रशिक्षण बीत इनाप यानादिल ।

नेवाः स्यनामि दबूया न्वकु कृष्णभक्त मानन्धरया सभापतित्वय् जूगु उगु ज्याझ्वलय् मूप्रशिक्षक बरुणप्रसाद बैद्यं लसकुस यानादीगु खःसा नेवाः सृष्टि कलाया नायः धर्म मुनिकारं थ्व तालिम लिपा आः बाजं स्यनीपिं गुरुपिंसं आः संगीत माध्यमं भाषा नं स्यना थके फइगु खँ कनादिल ।

ज्याझ्वलय् प्रशिक्षार्थीपाखें बाजंगुरु सुदन मुनिकार व संगीता कपालीपिंसं थःगु अनुभव न्यंकादीगु खः । स्वन्हुयंकं जूगु तालिमय् थीथी प्रशिक्षकपिंसं प्रशिक्षण बियादीगु खः ।