ने. सं. ११४३ चौलाथ्व तृतीया -

चलखेल यानाः दंगु भावं मीगु तयारी

निगमं वार्तापाखें बोइङ मीगु

येँ – नेपाल वायुसेवा निगमं मी मफयाच्वंगु बोइङ ७५७–२०० विमान चलखेल यानाः दंगु भावं मीत्यंगु दु । निगमं थ्व विमान मीगु निंतिं निक्वःतक बोलपत्र आह्वान यातं नं मीमफयेवं आः ‘आपसी सहमति’ मीगु खँ धाःगु दु । थ्व ‘आपसी सहमति’ दुनेहे चलखेल यानाः दंकं मीत्यंगु खः ।

निगमं बोलपत्र आह्वान याःबलय् थ्व विमानया न्यूनतम मू हे ८५ करोड तका तोके यानातःगु खः । तर आः ‘आपसी सहमति’इ मीगु निंतिं विमानया मू धाःसा बछि जक क्वःछिउगु दु । निगमं आः थ्व विमानया मू ४८.५ करोड जक तोके यानाः मीगु निंतिं वार्ता न्ह्याकूगु दु । निगमं थुकथं छक्वलं बछि धयाथें मू क्वकयाः वार्ता पाखें विमान मीत्यंगु खँय् चिउता प्वंकुसें चलखेल जूगु आशंका यानाहःगु खः ।

निगमया आर्थिक नियमावली २०६५ कथं वार्तापाखें विमान मीगु तयारी याःगु खः । निगमया सहप्रवक्ता सुलेख मिश्रं बिबिसीलिस खँ ल्हासें नियमावलीया २४या कार्यविधि कथं प्रक्रिया न्ह्याःवंगु खँ धयादीगु दु । निगमं थ्वयां न्ह्यः नं छगः विमान थथे हे वार्तापाखें मी धुंकूगु दु ।

निगमं कल साइन ९ एन एसीएस दुगु बोइङ ७५७–२०० विमान वार्ता पाखें गैरआवासीय संघया पुलांम्ह अध्यक्ष भवन भट्टया बीबी एयरवेजयात मिउगु खः । उबलय् थ्व विमान गुलि ध्यबा मिउगु धयागु बारे धाःसा निगमं जानकारी बियाच्वंगु मदु । उबलय् थ्व विमान मुक्कं १२ करोड दामं मिउगु खँ पिहां वःगु खः ।

तर थ्व विमानय् च्वंगु पार्टपुर्जा जक मिउसां नं १२ करोड तकां अप्वः वइगु जुइ । न्हापा थथे ‘चलखेल’ यानाः दंगु भावं विमान मिउगुलिं नं आः नं अथे हे यानाः विमान मीत्यंगु आशंका यानाहःगु खः । थथे अनियमितढंगं विमान मीगु निंतिं हे निगमपाखें हे न्हापाया बोलपत्र असफल याःगु खँ नं पिहां वयाच्वंगु दु ।

नेपाल वायुसेवा निगमया पुलांम्ह क्याप्टेन वाइ के भट्टराईं पारदर्शी रुपं बोलकबोल प्रक्रिया न्ह्याकूगु जूसा विमान अवश्य मीफइ धासें निगमं न्हापां निसें हे कमिशनया कारणं विमान न्याये–मी यायेबलय् चलखेल जुइगु प्रवृत्ति दुगु खँ धयादीगु दु । निगमं एयरबस विमान हयेधुंकूगु पुलांगु निगः न्यारोबडी बोइङ विमानयात प्रतिस्थापन यायेगु निंतिं मीगु कुतः यानाच्वंगु खः ।

निगमया थ्व विमान आः नं ब्वयेका हे यंकेफइगु अवस्था दुगु खँ पुलांम्ह क्याप्टेन भट्टराई धयादीगु दु ।मेखे निगमं धाःसा विमान मी हे माःगु बाध्यता थःपिंके दुगु खँ धयाच्वंगु दु । अन्तर्राष्ट्रिय नागरिक उड्डयन संगठन (आइकाओ)या मापदण्ड कथं थ्व विमान सन् २०२० या मार्च तकया दुने मीमफत धाःसा नेपालं ब्वयेका यंकेदइमखु । थ्व विमान आः पूवंक हे ग्राण्डेड जुयाच्वंगु दु ।