अस्ट्रेलियाय् गर्मी तच्वल

एजेन्सी – अस्ट्रेलियाया सिडनीइ वंगु शनिवाःया चान्हसिया तापक्रम आःतकया हे दकलय् अप्वः मापन याःगु दु । चान्हय्सिया तापक्रमया अभिलेख तयेगु सुरु यायेधुंकाः शनिवाः चान्हय् दकलय् अप्वः २५.४ डिग्री सेल्सियस थ्यंगु खँ स्थानीय मौसम विभागं धाःगु दु ।

सिडनीया अब्जर्भेटिभ हिलय् चान्हय् २५.४ डिग्री थ्यंगु तापक्रम सुथय् ४ः३० बजे तक जूबलय् ३० डिग्री थ्यनेधुंकूगु खँ सिडनीया मर्निब हेराल्ड पत्रिकां धाःगु दु। थ्वयां न्ह्यः सन् १९६७ य् अब्जर्भेटिभ हिलय् नोवेम्भरय् महिनाया रात्रिकालीन तापक्रम २४.८ डिग्री तक मापन याःगु खः । सिडनीइ तसकं तांन्वया वयेवं यक्व मनूत समुद्री तटय् वयेगु सुरु जूगु दु। थथे भिड यायेबलय् कोरोना भाइरस न्यनेफुगु जूगुलिं राज्यया स्वास्थ्य विभागं मनूतय्त भौतिक दूरी कायम यायेत सचेत यानाच्वंगु दु ।

तापक्रम अप्वया वयेवं अस्ट्रेलियाया न्यू साउथ वेल्स राज्यया पूर्वी व पूर्वात्तर भागय् पिने मि च्याकेत निषेध याःगु दु । अस्ट्रेलियाय् थगुने गर्मीया इलय् जंगलय् तच्वःगु मिं नःगु खः । थ्व मिं यानाः कराडौं अर्बौं जीवजन्तुत सीगु अनुमान यानातःगु दु। थुबलय् अस्ट्रेलियाया २.४ करोड हेक्टर जमिनय् मि नःगु खः । थुकियात अस्ट्रेलियाया इतिहासय् हे दकलय् तच्वःगु मि नःगु घटना धयातःगु दु। थ्व घटनाय् स्वद्वलं मल्याक छेँ मिं नःगु खःसा ३३ म्ह मल्याक मनूतय् ज्यान वंगु खः ।

सम्बन्धित बुखँ

LEAVE YOUR COMMENTS