विश्व सम्पदां दछि लिपा चीकेफु

येँ -विश्व सम्पदाया धलखय् लाःगु नेपाःया थीथी सम्पदायात युनेस्काें खतराया धलखय् तयेगुपाखें चीकूसां दछि लिपा धाःसा हानं गुगुं नं इलय् खतराया धलखय् तये फइगु खँ धाःगु दु । आःयात युनेस्कों दछिया निंतिं तक खतराया धलखय् तयेगुपाखें चीकूसां खःसा आः वधुंकाः छु यायेगु धइगु बारे संस्कृति मन्त्रालयं सरोकारवालातलिसे सहलह याइगु जूगु दु ।

दछिया निंतिं खतराया धलखय् मतसे युनेस्कों बिउगु सुझावयात कयाः सहलह यायेगु तयारी मन्त्रालयं याःगु खः । मन्त्रालयं जक यानाः सम्पदायात ल्यंके फइ मखु धासें थुकथं सहलह यायेगु तयारी यानाच्वंगु खः । सहलह लिपा सम्पदा संरक्षणया निंतिं मंकाः कथं ज्या यायेगु निंतिं माःगु रणनीति दयेकेगु खँ नं मन्त्रालयं धाःगु दु ।

स्वनिगलय् २०७२ सालया तःभुखाचं ध्वस्त जूगु सम्पदा पुनर्निर्माण जुयाच्वंगु दु । उगु पुनर्निर्माणया झ्वलय् छ्यःगु सामग्रीयात कयाः विवाद ब्वलनेगु यानाच्वंगुलिं अज्याःगु विवाद मदयेकेगु कथं नं मन्त्रालयं ज्या यायेगु तयारी यानाच्वंगु खः ।

विशेष यानाः पशुपतिइ सतक दयेकेगु निंतिं अन आधुनिक निर्माण सामग्री छ्यलाः पुनर्निर्माणया ज्या जुयाच्वंगुयात गुकथं पनेगु धकाः नं मन्त्रालयं विशेष ध्यान बीगु कुतः जुयाच्वंगु खँ सीदुगु दु ।

स्वयम्भूइ नं आधुनिक निर्माण सामग्री छ्यलाः गुम्बा दयेकाच्वंगु व उकियात कयाः नं सहलह याइगु खँ धाःगु दु । युनेस्कोया प्रतिनिधि नेपाः वये न्ह्यः हे माःगु सल्लाह यानाः पुनर्निर्माणया झ्वलय् पिहां वयाच्वंगु विवाद समाधान यायेगु तयारी जुइ धाःगु दु ।