मनुखं चन्द्रमाय् पलाः तःगु न्यय्दँ उत्सव

मनुखं चन्द्रमाय् पलाः तःगु ५० दँ क्यंगु लसता विश्वन्यंकं थीथी ज्याझ्वः यासें हंगु दु । सन् १९६९ या जुलाई २० य् अन्तरिक्ष यात्री निल आर्मस्ट्रंगं न्हापांखुसी चन्द्रमाय् पलाः तःगु खः । थुकुन्हु अमेरिकी अन्तरिक्ष केन्द्र नासां छ्वःगु एपोलो ११ यानं इगल मोड्युल ट्र्याङ्कुलीटीया आधारय् चन्द्रमाय् अवतरण याःगु खः ।

यान चन्द्रमाय् दीगु घन्टौं लिपा आर्मस्ट्रङ्ग यानं कुहां वयाः चन्द्रमाय् पलाः तःगु खः । थ्व क्षणयात खगोल क्षेत्रय् रुचि तइपिं विशेष क्षण कथं लुमंकेगु यानाच्वंगु दु । ५० औं वार्षिकोत्सवया लसताय् नासां चन्द्रमाय् पलाः तःगुया भिडियो फुटेज अनलाइनय् तःगु दु । थुकिं यानाः न्हू पुस्तापिंसं ५० दँ न्ह्यःया थ्व ऐतिहासिक दृष्य हाकनं स्वयेगु ह्वःताः चूलाकूगु दु ।

अन्तरिक्ष यान चन्द्रमाय् अवतरण जूबलय् एपोलो ११ या कमान्डर आर्मस्ट्रङ्गं धाःगु खः, ‘ह्युस्टन ट्र्यान्क्वीलीटी बेस हियर । द इगल ह्याज ल्यान्डेड ।’ह्युष्टनय् च्वंगु मिसनया संचारकेन्द्रपाखें थुकिया लिसः बिसें चाली ड्युकं धाःगु खः, ‘रोजर ट्र्याङ्क्वीलीटी वी कपी यु अन द ग्राउण्ड । यु गट अ बञ्च अफ गाइज अबाउट टु टर्न ब्लु । वी आर ब्रिदिङ अगेन ।’

थुकिया छुं घौ लिपा चन्द्रमाया सतहय् न्हापांगु पलाः तसें नील आर्मस्ट्रङ्गं धाःगु खः, ‘थ्व मनूया चिधंगु पलाः खः, तर मानवया निंतिं तःधंगु छलाङ्ग खः ।’आर्मस्ट्रङ्गया लिसें बज एल्ड्रीन व माइकल कलिन्स नं चन्द्रमा मिसनय् वंगु खः । थुपिं स्वम्हं सन् १९३० य् बूपिं खः । चन्द्रमा थ्यंपिं मध्ये एल्ड्रीन व कलिन्स अझं जीवित दनिसा आर्मस्ट्रङ्ग सन् २०१२ य् ८२ दँया वैंशय् मदुगु खः ।

चन्द्रमाय् पलाः तःम्ह एल्ड्रीनं शनिवाः ट्विट यासें धाःगु खः, ‘थौं अमेरिकां छगू तःधंगु न्ह्यसःया लिसः बिउगु दु । झीपिं अन दकलय् न्हापां थ्यंगु खः । जिपिं चन्द्रमाय् अवतरण जूगु २५ करोड अमेरिकीतय्सं स्वःगु खः ।’‘सत्य थ्व खः कि थ्व मिसन झीगु अवतरण स्वःपिं सकसिगुं निंतिं जूगु खः व हाकनं चन्द्रमाय् थ्यंकेगु म्हगस खंकाच्वंपिं भावी अमेरिकीतय्गु नं खः ।’

चन्द्रमा अभियानया मेम्ह यात्री माइकल कलिन्सं फक्स न्यूजयात धाःगु दु, ‘जिं अपाय्सकं लुमंकेगु मयाना । जिं शान्त जीवन हना । गुबलें गुबलें गल्लीइ न्यासि वनाच्वनेबलय् चान्हय् जुइ, जिं जिगु जवगु ब्वहलय् छुं महसुस याये, अले आकाशपाखे स्वये । वह थें जल्ल थिनाच्वंगु आकारपाखे स्वयाः सोचे याये, ‘ओहो थ्व ला चन्द्रमा खः, गन जि वना वयागु खः ।’

विश्वन्यंकं चन्द्रमाय् पलाः तःगु ५० औं वार्षिकोत्सव हनेगु झ्वलय् थीथी थासय् आर्मस्ट्रङ्गं न्हापांगु पलाः तःगु लुमंकेत न्हूदँ हनेबलय् थें काउन्ट डाउन याःगु खः । भर्जिनियाय् च्वंगु स्मिथसोनियनया एअर एण्ड स्पेस म्युजियमय् चन्द्रमां मुंकाहःगु थीथी वस्तुया प्रदर्शनी याःगु खः । अथेहे नील आर्मस्ट्रङ्गं फिनावंगु अन्तरिक्ष लं नं प्रदर्शनीइ तःगु खः । पेरिसय् नं चन्द्रमा केन्द्रीत थीथी भिडियो प्रदर्शन यानाः वार्षिकोत्सव न्यायेकूगु खः ।

सम्बन्धित बुखँ

LEAVE YOUR COMMENTS