मास्टर जगतसुन्दर मल्लया १४१ दँ बुन्हि हन

येँ (नेपालभाषा टाइम्स)- नेपाल भाषाया प्यंगःथां मध्ये छगः ख्वपया मास्टर जगतसुन्दर मल्लया १४१ दँ बुन्हि म्हिगः येँया जगतसुन्दर ब्वनेकुथिइ हन । मस्तय्त मांभासं आखः स्यनेमाः धकाः न्हापांखुसी प्रचार यानादीम्ह वयकःया झ्वाताय् स्वां देछानाः बुन्हि हनेगु ज्या जूगु खः ।

बुन्हि हना ज्याझ्वलय् न्हूदँ समारोह समिति ११४४ या नायः प्रा.डा. नरेशमान बज्राचार्यया मूपाहांकथं झाःगु खः । ब्वनेकुथिया न्वकु विष्णु चित्रकारया सभापतित्वय् न्ह्याःगु उगु ज्याझ्वलय् मन्दः च्वज्या, च्वखँ च्वज्या व कार्ड च्वज्याय् ताःलाःपिन्त सिरपाः लःल्हायेगु ज्या नं जूगु खः ।

ज्याझ्वलय् लोककवि राजभाइ जकःमिं लसकुस यानादीगु खःसा प्रा.डा. बज्राचार्य, मल्ल (प्रधानांग ) प्रतिस्थानया नायो डा. माधव सुन्दर मल्ल, विष्णु चित्रकारपिन्सं मल्ल व स्वन्ति नखःया बारे थःथःगु खँ प्वंकादीगु खः ।

ब्वनेकुथिया ब्वमिपिं रविना श्रेष्ठ, कीर्ति नकःमि, पल्पसा बज्राचार्यपिन्सं जगत सुन्दर मल्लया व्यक्तित्व व जीवनीयात कःघानाः च्वयातःगु रचना नं वाचन याःगु खः । ज्याझ्वः ब्वनेकुथिया प्रिन्सिपल सुनिता मानन्धरं न्ह्याकादीगु खः ।

थुकथं हे जगतसुन्दर मल्लया बुन्हि विराट नेपालभाषा साहित्य सम्मेलन गुथिपाखें ख्वपय् नं हंगु दु । ख्वपया खौमा त्वालय् च्वंगु जगतसुन्दर मल्लया झ्वाताय् स्वां देछानाः बुन्हि हनेगु याःगु खः । ज्याझ्वलय् थीथी साहित्यकारपिंसं न्ववानादीगु खः ।

नेपालभाषा टाइम्स

च्वमिया मेमेगु

• भ्वँतय् न्हापांखुसी नेपालभाषा साहित्य तःमुँज्या
• न्हूदँया लसताय् येँ–चौतारा मोटरसाइकल र्‍याली
• संस्कृतिविद् गणेशराम लाछिया ७५ क्वःगु बुन्हि हन
• लुँया भावय् न्हूगु कीर्तिमान
• नेपालय् न्ह्यानाच्वंगु जुजुवादी आन्दोलन, भारतीय हिन्दूत्वया लिच्वः