पेरुया पुलांम्ह राष्ट्रपतिपाखें माफी बीत माग

लिमा – पेरुया पुलांम्ह राष्ट्रपति अलेजान्द्रो टोलेडों मानवीय लिधंसाय् थःत माफी बीत माग याःगु दु । पुलांम्ह राष्ट्रपति टोलेडों थःगु स्वास्थ्य अवस्था गम्भिर रुपं स्यना वनाचवंगु धासें मानवीय लिधंसाय् माफी बीत सरकारयात औपचारिक रुपं माग याःगु खः ।

थौंकन्हय् ८१ दँय् क्यनाच्वंम्ह पुलांम्ह राष्ट्रपति टोलेडो भ्रष्टाचार सम्बन्धी मुद्दाय् २० दँया जेल सजाय फयाच्वंगु दु । टोलेडोया कानुन व्यवसायीतय्सं सोमवाः उगु निवेदन सरकार समक्ष पेश यानागु पुष्टि याःगु दु । टोलेडों सरकारयात लःल्हाःगु लिखित निवेदनय् जेल जीवनया झ्वलय् थःगु स्वास्थ्य अवस्था मदिक्क स्यना वनाच्वंगु खँ न्ह्यथँसें चिकित्सकतय्सं गुगुं नं इलय् थःत हृदयाघात वा मष्तिष्कघात जुइ फुगु ख्याच्वः बिउगु खँ न्ह्यथनातःगु दु ।

टोलेडोया छम्ह वकिल कार्लोस टोरेसं टोलेडोया स्वास्थ्य अवस्था चिन्ताजनक जुजुं वनाच्वंगुलिं माफीया माग अपरिहार्य जूगु समाचार संस्था एएफपीयात धाःगु दु । कार्लोसया कथं टोलेडोया रिहाइया निंतिं औपचारिक निवेदन सोमवाः लिमा प्रशासनय् दर्ता याःगु खः ।

सन् २००१ निसें २००६ तक पेरुया राष्ट्रपति जूम्ह टोलेडोयात सन् २०१४ य् ब्राजिलया छगू निर्माण कम्पनी ओडेब्रेक्टलिसे सम्बन्धित बहुचर्चित भ्रष्टाचार काण्डय् करोडौं डलर घुस काःगु द्वपनय् २० दँया जेल सजाय न्यंकूगु खः।