पाकिस्तान जुयाः भारत वनेत भिसा

येँ – नेपाः व भारतीय नागरिकयात छगू देशं मेगु देशय् वये–वने यायेत भिसा आवश्यक मजू । अथे खःसां पाकिस्तान लिसें चीन, हंगकंग व मकाउ देशं ट्रान्जिट जुयाः भारत दुहां वने माल धाःसा भिसा आवश्यक जुइगु खँ धाःगु दु । भारतस्थित नेपाली राजदूतावासं म्हिगः जारी याःगु छगू विज्ञप्तिइ थ्व खँ धयातःगु खः ।

लिसें भारतीय अध्यागमन पार यानाः साउदी अरेबिया, कतार, कुवेत, युएई, ओमन, बहराइन, इराक, लिबिया व लेबनान यात्रा याइपिंसं ‘नो अब्जेक्सन’ लेटर कायेमाःगु खँ नं विज्ञप्तिइ धयातःगु दु । भारतस्थित नेपाली दूतावासं थ्व नो अब्जेक्सन लेटर जारी याइ ।