न्हूदँया लसताय् सांस्कृतिक ज्याझ्वः

येँ (नेपालभाषा टाइम्स) – नेपाल संवत् न्हूदँ राष्ट्रिय समारोह समिति-११४१ या ग्वसालय् न्हूदँ ११४१या लसताय् न्हूदँ सांस्कृतिक ज्याझ्वः वंगु शनिवाः जुल । थनया जगतसुन्दर ब्वनेकुथिइ जूगु सांस्कृतिक ज्याझ्वलय् नेपालभाषाया न्हूपिं व पुलांपिं कलाकारपिंसं थःथःगु सांस्कृतिक प्रतिभा न्ह्ब्वःगु खः ।

भाषासेवी निरञ्जनरत्न शाक्यं उलेज्या यानादीगु ज्याझ्वलय् न्हूदँ समारोह समितिया सचिवालय दुजः सुजीव वज्राचार्यं लसकुस यानादीगु खःसा नायः रमेश महर्जनं नुगःखँ प्वंकादीगु खः । नांजाःम्ह म्येँ हालामि पवित्र कसाःलं संयोजन यानादीगु ज्याझ्वः प्रबोध कसाः, रविन्सन कसाः व राहुल शाक्यया पुचलं गितारया धुनय् नासःद्यःया धुनपाखें न्ह्याःगु खः ।

सांस्कृतिक ज्याझ्वलय् मय्जु सुमन मानन्धर व रविन्सन कसाः, दीपेन्द्र व बबिता वज्राचार्यं ज्वःम्येँ न्ह्यब्वयादीगु खःसा सिद्धार्थ वज्राचार्य, मञ्जिल शाक्य, अमोघवीर वज्राार्य, किशोर महर्जन, ताराराम मुनंकःमि लगायतं नं म्येँ न्ह्यब्वयादीगु खः । थुकथं हे ज्याझ्वलय् अनिल महर्जन, रावल महर्जन, रितु दर्शनधारी, गरिमा श्रेष्ठं पुचः व हसना महर्जन, रमन महर्जन, आराध्यलक्ष्मी खड्गी, पारु रघुवंशी, मचा कलाकार इभा शाहीं नं हुलाप्याखं न्ह्यबवयादीगु खः ।

अथे हे सिजेन चित्रकार, विवेक श्रेष्ठ, सुजल नापित, कृति महर्जन, रिति महर्जन, रोजिना महर्जन, प्रिन्सा महर्जन व अमिषा महर्जनया पुचलं यइपुक बाजंया धुन न्ह्यब्वयादीगु खः ।