बेलायती समाजय् नेवाः विषयय् गोष्ठि

येँ(नेपालभाषा टाइम्स)- बेलायतया लन्दनय् च्वंगु नेवाःतय् संस्था पासा पुचः गुथि (पीपीजी) युके लन्दनया ग्वसालय् ‘नेवाः इन कन्टेम्पोररी ब्रिटिश सोसाइटी’ (समकालीन बेलायती समाजय् नेवाः) विषययात कयाः छगू गोष्ठि जुल ।

लन्दनस्थित सोआस विश्वविद्यालयया खलिलि लेक्चर सेन्टरय् कला व संस्कृति, भाषा व नसा, एसटीएएम (स्टेम) व वित्त तथा उद्यमशीलता यानाः प्यंगू सत्रय् जूगु गोष्ठिइ ७० म्ह स्वयां अप्वःसिया सहभागिता दुगु खः ।

नेपाः व नेवाः समुदायया बारे विशेष अध्ययन यानादीम्ह फ्रान्सेली सामाजिक मानवशास्त्री व इन्डोलोजिस्ट प्रोफेसर गेरार्ड टफिन मूवक्ताकथं ब्वनातःगु खः । ज्याझ्वलय् बेलायतया मेपिं झिंनिम्ह वक्तापिंसं थीथी विषययात कःघानाः थःथःगु धारणा तयादीगु खः ।

पीपीजी युकेया पुलांम्ह नायः संयुक्त श्रेष्ठया अध्यक्षताय् न्ह्याःगु न्हापांगु सत्रया ज्याझ्वः कला व संस्कृति विषयय् जूगु खः । थुकी पत्रकार सुविना श्रेष्ठ, भिएफएक्स आर्टिस्ट सन्दीप तुलाधर, च्वमि क्रिष्टिना चित्रकार द्यः प्याखं (संकिपा), एनिमेसन व हालय् पिहां वःगु ‘नेपाल रिम्बेम्बर’या विषययात कयाः थःथःगु धारणा न्ह्यब्वयादीगु खः ।

निगूगु सत्रया ज्याझ्वः भाय् व नसा विषयय् प्रचलित लिपि, विद्यालयय् नेपालभाषा विषयय् भाषा शिक्षा व ज्ञान निर्माण व नसापाखे लन्दनय् नेवाः नसा ज्वलनय् छ्वाय्लाया लोकप्रियतायात कयाः जूगु खः । थुगु सत्रया अध्यक्षता नेपाः व विशेष यानाः नेवाःतय् बारे गाक्कं अध्ययन व अनुसन्धान यानादीम्ह नापं गुथिया संरक्षकतकं जुयाच्वनादीम्ह बेलायतया अक्सफोर्ड विश्वविद्यालयया सामाजिक मानवशास्त्री प्रोफेसर डेभिड गेल्नरं यानादीगु खः । थगु सत्रय् साओस लन्दन विश्वविद्यालयया डा. अलेक्जेण्डर जेम्स ओ’निल, युसीएल शिक्षण संस्थाया लेक्चरर डा. उमा प्रधान व कर्क विश्वविद्यालयया सहायक लेक्चरर मालिलेना फ्रिसोन नं वक्ताकथं ब्वति कयादीगु खः ।

गुथिया पुलांम्ह नायः डा. सचेतन तुलाधरया अध्यक्षताय् जूगु एसटीइएम (स्टेम)या विषयय् जूगु खः । थुुग सत्रय् ब्वति कयादीपिं वरिष्ठ सफ्टवेयर इन्जिनियर दीपक श्रेष्ठ, पशु चिकित्सक कृषा मानन्धर व क्लिनिकल डाइरेक्टरलिसें प्रोस्थोडोन्टिक्स विशेषज्ञ डा. अनिल श्रेष्ठं ‘दृष्टिकोण परिवर्तन’, ‘पशु चिकित्सकया रुपय् जीवन’ व ‘नेपालय् दन्त चिकित्सा विकासय् नीदँ’ थेंज्याःगु विषयय् थःथःगु अनुभवलिसें धारणा तयादीगु खः ।

समुदाय दुने सहयात्रा, समन्वय, दिगो वित्त व व्यक्तिगत सफलताया विषययात कः घानाः वित्त व उद्यमशीलता विषयय् जूगु दकलय् लिपांगु सत्र गुथिया बोर्ड अफ ट्रस्ट्रीजया अध्यक्ष ओजेश सिंहया अध्यक्षताय् जूगु खः । थुगु सत्रय् वक्ताकथं धितो विशेषज्ञलिसें व्यवसायी प्रजेश श्रेष्ठ, सस्टेनेबल फाइनान्स बाक्र्लेजया सहअध्यक्ष सुरज कर्माचार्य व उद्यमी सुशील प्रजापतिं ब्वति कयादीगु खः ।

ज्याझ्वलय् मूवक्ताकथं झायादीम्ह टफिनं परम्परागत व आधुनिक इलय् नेवाःतय् गुथि परम्परा व प्रणालीया विषयय् मू न्वचु तयादीगु खःसा नेपाःया नेवाः, गुथि व इमिगु संस्कृति अध्ययनय् ज्वःमदुगु योदान बियादीगु धासें वय्कःया हनेज्या नं याःगु खः ।

गुथिया नायः रुक्मणि मानन्धरया सभापतित्वय् जूगु ज्याझ्वलय् वय्कलं लसकुस यासें ज्याझ्वःया आवश्यकता बारे नुगःखँ तयादीगु खः । गोष्ठिया संयोजक मधुसुदन कायस्थं गोष्ठिया उद्देश्य कनादीगु ज्याझ्वलय् गुथिया मूछ्याञ्जे लिसा दली श्रेष्ठं लसकुस यानादीगु खः ।