लहनापाखें थीथी पत्रकार सम्मानित

येँ(नेपालभाषा टाइम्स)÷लहना वाःपौ प्यसःगू ल्याः पिहां वःगु लसताय् छगू ज्याझ्वःया दथुइ थीथी पत्रकारतय्त सिरपाः व सम्मान लःल्हाःगु दु । वाःपौ पाखें भाषा, कला, संस्कृति, शिक्षा ख्यलय् योगदान बियादीपिं पत्रकार व विशिष्ट व्यक्तित्वपिंत सम्मान याःगु खः ।

वाःपौपाखें भाषा, जाति व पहिचानया क्षेत्रय् विशिष्ट योगदान बियादीगुलिं नेवाः न्ह्यलुवा मल्ल के. सुन्दर, मातृभाषा शिक्षाया निंतिं ऐन पारित यायेगु ज्याय् विशेष भूमिका म्हितादीगु धासें संघीय मामिला तथा सामान्य प्रशासन मन्त्री राजेन्द्रप्रसाद श्रेष्ठ, येँ महानगरय् स्थानीय पाठ्यक्रम ‘येँ देय् म्हसीके’ कार्यान्वयनय् हयादीगुलिं पुलांम्ह महानगर प्रमुख विद्यासुन्दर शाक्ययात विशेष हनेज्या याःगु खः । वय्कःपिंत लहना पंचवीर सिंह तुलाधर सम्मान लःल्हाःगु खः।

कोरोना महामारीया कारणं वंगु निदँतक दिना च्वंगु सिरपाः लःल्हायेगु झ्वलय् नेवाः समुदायया भाषा, जाति, कला, संस्कृति उत्थानय् विशेष योगदान बिउगु धासें प्रजित शाक्य (गोरखापत्र), विराजकाजी राजोपाध्याय (समाचारडेस्क) व रत्नकाजी महर्जन (मेरो साप्ताहिक)यात झिंन्याद्वः तकाया लहना धर्म मोति सिरपाः लःल्हाःगु खः ।

अथे हे मनोरञ्जनमक ख्यःलिसें भाषा, संस्कृतिया उत्थानय् बिया वयाच्वंगु योगदानया कदर यासें निर्देशक कलाकार रामकृष्ण खड्गी, कलाकार स्वतन्त्र संसार महर्जन व पत्रकार यलु जोशीयात लहना शर्मिष्ठा सुर सम्मान लःल्हाःगु खःसा लहना न्यू जेनिथ फोटो पत्रकार अनुप प्रधान, गुणराज शाक्य व श्यामकुमार थायात लःल्हाःगु खः।

थुकथं हे नेवाः एचडी टेलिभिजनया नविनकुमार जोशी, ज्वज्वलपा वाःपौया नजरराम महर्जन व संचारकःमि पूर्णिमा शाक्ययात लहना केशव कृष्णवदन मातृभाषा सिरपाः लःल्हाःगु खः।

संस्कृतिह्यमि शरदकुमार डंगोल, एरोसानया प्रकाश अमात्य, संकिपा निर्देशक अमृतचन्द्र्र श्रेष्ठयात लहना विशेष सम्मानं सम्मानित याःगु ज्याझ्वलय् सम्मानित व्यक्तित्वपिं मन्त्री श्रेष्ठ, निवर्तमान महानगर प्रमुख शाक्य, बागमति प्रदेश सांसद राजेश शाक्य, पत्रकार दबूया नायः सुरजवीर वज्राचार्य, आदिवासी जनजाति पत्रकार महासंघया न्वकु लक्की चौधरी लगायतं नुगःखँ तयादीगु खः ।

लहनाया प्रधान सम्पादक नृपेन्द्रलाल श्रेष्ठया सभापतित्वय् नेपालभाषा एकेदेमिया चान्सलर यज्ञरत्न धाख्वा मूपाहांकथं झायादीगु ज्याझ्वलय् व्यवस्थापक सुरेन्द्रभक्त श्रेष्ठं लसकुस यानादीगु खः ।

सम्बन्धित बुखँ

LEAVE YOUR COMMENTS