कलाकार आशाकाजीयात हनीगु

ख्वप(नेपालभाषा टाइम्स)- ख्वप मिडिया सर्कलं वरिष्ठ कलाकार आशाकाजी थकूयात हनीगु जूगु दु । सर्कलया वंगु सोमवाः च्वंगु छगू मुँज्यां थ्व हे वइगु विक्रम संवत् २०७९ न्हूदँया लसताय् विशेष ज्याझ्वः यानाः वरिष्ठ कलाकार थकूयात हनेगु क्वःछिउगु खः ।

न्हूदँ हनेगुलिसें ख्वपया तःजिगु बिस्काः जात्राया इलय् विशेष ज्याझ्वः यानाः कलाकार थकूयात हनेगु ज्याझ्वलय् येँ, यल व ख्वपया विशिष्ट कलाकारतय्त ब्वनेगु सर्कलं जानकारी बिउगु दु । ज्याझ्वलय् ख्वपय् च्वनाः थःगु कलाकारितायात निरन्तरता बिया वयाच्वनादीम्ह थकूलिसें ख्वपं येँय् वयाः कलाकारिताय् सक्रिय जुयाच्वनादीपिं वरिष्ठ कलाकार राजेन्द्रमान शाक्य व हरिमान दिवाकरयात नं हनेगु ग्वसाः खलकं जानकारी बिउगु दु ।

सर्कलं थ्व स्वयां न्ह्यः कलाकार मदनकृष्ण श्रेष्ठयात हनेज्या याःगु खः । थनया ख्व¥हंय् च्वंगु सिद्धि समृति भवनय् जुइगु ज्याझ्वलय् म्येँ, हुलाप्याखं नापं थीथी सांस्कृतिक ज्याझ्वः नं न्ह्यब्वयेगु जूगु दु ।

ज्याझ्वः ताःलाकेत सुरेन्द्र था श्रेष्ठया संयोजकत्वय् छगू व्यवस्थापन समिति नं नीस्वंगु दुसा उकिया निंतिं तयारी न्ह्यायेधुुंकूगु सर्कलया नायः राजु मानन्धरं जानकारी बियादीगु दु ।