अपर्णा प्रधानया प्यंगू सफू पितब्वज्या

यल(नेपालभाषा टाइम्स)- नांजाःम्ह मिसा साहित्यकारलिसें समालोचक अपर्णा प्रधानया प्यंगू सफूया पितब्वज्या जुल । कुतः पिकाकःया ग्वसालय् थनया लुभुइ च्वंगु महालक्ष्मी ब्यांक्वेटय् जूगु ज्याझ्वलय् चिबाखं मुना, आत्मवृत्तान्त व समालोचना मनाु सफूया पितब्वज्या याःगु खः ।

बाखं च्वमि, निबन्धकार, उपन्यासकालिसें समालोचक प्रधानया निगू चिबाखं मुना सफू ‘यान्त्रिकपु’ व ‘ल्वहं द्यः’ आत्मवृत्तान्त सफू ‘पुनर्जन्म’ व समालोचना मुना ‘प्रतिविम्ब’या पितब्वज्य याःगु खः । थुपिं सफूत नेपाल साहित्य मन्दिरया संस्थापक तिलकप्रकाश कायस्थ, साहित्यकार व समालोचकलिसें नेपालभाषा एकेदेमिया सदस्य सचिव डा. पुष्पराज राजकर्णिकार, समालोचक पूर्ण ताम्राकार व महालक्ष्मी नगरपालिकाया प्रमुख हरिगोविन्द श्रेष्ठं पितब्वज्या यानादीगु खः ।

एकेदेमिया सदस्य सचिव डा. राजकर्णिकारं पितब्वज्या जूगु सफूयात कयाः समीक्षात्मक टिप्पणी यानादीगु खः । वय्कलं यान्त्रिकपुर सफुतिइ च्वमिं मार्मिक धंगं न्हू पुस्तात विदेश पलायन जुइगु क्रम अप्वया वनाच्वंगुयात चित्रण याना तयादीगु खँ कनादिसें थुकथंया विषय उत्थान यानादीगुलिं च्वमिप्रति आभार प्वंकादिल ।

वय्कलं थौंकन्हय्या न्हू पुस्ता ब्वनाः सक्षम जुइधुंकाः विदेश पलायन जुइगु क्रम अप्वयाच्वंगु खँय् चिउताः प्वंकादिसें थुकियात पनेगु ज्या याये मफुत धाःसा वइगु दिनय् नेपाः छगूकथंया वृद्धाश्रम थें जू वनीगु थेंज्याःगु खँ सफुतिइ दुथ्याकातःगु व थ्व दकलय् चिउताःया विषय जुयाच्वंगु खँ धयादिल ।