खुया यंकूपिं द्यःत लित वल

यल -यलया वडा नं. १६ स्थित धौगल बजारय् स्थानीय माइकल शाक्यया द्यः दयेकीगु कारखानां खुया यंकूगु १६ म्ह धातुया द्यः प्रहरीं लुइकूगु दु । वंगु चैत १३ गते चान्हय् शाक्यया कारखानां थीथी आकृतिया १६ म्ह द्यः खुया यंकूगु खः । उकियात कयाः प्रहरीं छानबिन यायां वंबलय् यलया वडा नं. ९ स्थित बालकुमारीया छगू ग्यारिजय् सुचुकातःगु अवस्थाय् लुइकूगु खः ।

थ्व फुक्कं द्यः काभ्रेपलाञ्चोकया बेथान गाउँपालिकाय् छेँ जुयाः मंगलय् बालं च्वनीम्ह राजकुमार सुनारं खुया यंकूगु खँ नं प्रहरीं धाःगु दु । सुनारं अन खुया यंकूगु द्यः फुक्कं स्थानीय केदार केसीया जग्गाय् प्रभु साह नांम्ह मनुखं सञ्चालन यानाच्वंगु ग्यारिजय् उगु द्यः सुचुकातःगु खः ।