ने. सं. ११४४ कछलागा षष्ठी -

‘पेट्रोलया भाः कुहां वइ मखु’

येँ (नेपालभाषा टाइम्स)- अन्त र्राष्ट्रिय बजारय् पेट्रोलियम पदार्थया भाः कुहां वयाच्वंसां नं नेपालय् धाःसा तत्काल भाः क्वकाये मफइगु खँ नेपाल आयल निगमं धाःगु दु । निगमं म्हिगः छगू विज्ञप्ति जारी यासें निगम अझ नं झिन्यान्हुया दुने ६३ करोड ५८ लाख तका घाटाय् दु धासें तत्काल भाः क्वमकायेगु खँ धाःगु खः ।

भारतीय आयल कर्पोरेशन (आईओसीं) थ्व स्वयां न्ह्यः निक्वः तक पेट्रोलियम पदार्थया भाः क्वकयाः छ्वयाहःगु खःसां नं निगमं धाःसा तत्काल भाः क्वमकायेगु खँ धाःगु खः । वंगु सोमवाः लिपांखुसी भारतं पेट्रोलय् १६ तका व डिजेलय् १२ तका भाः क्वकाःगु खः । निगमयात थौंकन्हय् पेट्रोलय् २ तका ७८ पैसा लबः दुसा डिजेलय् ९ तका ३७ पैसा व एलपी ग्यासय् प्रतिसिलिण्डर ४९९ तका द्यापं दुगु खँ निगमं धाःगु दु ।

निगमं आईओसीयात अझ नं २३ अर्ब तका पुलेमानि । उगु बक्यौता ध्यबा पुलाः बुलुहुँ पेट्रोलियम पदार्थया आपूर्ति सहज यायेमाःगु दायित्व दुगुलिं निगमं थ्व पालय् नं भाः क्वकाये मफइगु खँ स्पष्ट याःगु दु । थौं कन्हय् नेपालय् पेट्रोल लिटरं १८१ तका व डिजेल एवं मचिकं लिटरं १७२ तका थ्यं ।

थ्वहे झ्वलय् प्रमुख प्रतिपक्षी दल नेकपा एमालेया भातृ संगठन अनेरास्ववियुं पेट्रोलियम पदार्थया स्वचालित प्रणाली कथं भाः समायोजना यायत माःगु माग यासें प्रदर्शन याःगु दु । म्हिगः निगमया मू ज्याकु न्ह्यःने अनेरास्ववियु स्वनिगः विशेष कमिटीं उगु विरोध प्रदर्शन याःगु खःसा निगमयात ज्ञापन पौ नं बिउगु खः ।

अन्तर्राष्ट्रिय बजारय् पेट्रोलियम पदार्थया भाः कुहां वःगु व आईओसीं नेपाःयात भाः क्वकयाः छ्वया हलं तकं निगमं समायोजना मयाः धासें विरोध प्रदर्शन याःगु खः । अनेरास्ववियुं स्वचालित रुपय् भाः समायोजन मजू तले विरोधया ज्याझ्वः न्ह्याकाच्वनेगु खँ धाःगु दु ।

ज्ञापन पौ लःल्हाना कासें निगमया प्रवक्ता विनितमणि उपाध्यायं स्वचालित मूल्य प्रणाली लागू यायेत निगम प्रतिबद्ध जूगु खँ धयादीगु दु । निगमं अझ नं १४ अर्ब तका भारतयात पुले माःगुलिं माग पूवंके मफुगु खँ धयादीगु खः ।