प्रदेश ३ य् मुख्यमन्त्रीया निंतिं शाक्य व पौडेल दथुइ मतदान

प्रदेश नं. ३ य् अष्टलक्ष्मी शाक्य वा डोरमणि पौडेल मध्ये छम्ह मुख्यमन्त्री जुइगु जूगु दु । सहमतिया आधारय् मुख्यमन्त्री ल्यये मफयेवं थौं मय्जु शाक्य व पौडेल दथुइ संसदीय दलया नेताया निंतिं मतदान हे जुइत्यंगु दु ।

मतदानया निंतिं आःतक शाक्य व पौडेलं जक नां दर्ता याःगु दु । थ्वयां न्ह्यः मुख्यमन्त्रीया दावी यानाच्वंपिं केशव स्थापित, राजेन्द्र पाण्डे व सानु श्रेष्ठं धाःसा दावी त्वःताबिउगु दु । राजेन्द्र पाण्डें अष्टलक्ष्मी शाक्ययात समर्थन याःगु दुसा स्थापितं धाःसा पौडेलयात समर्थन याःगु दु । स्थापित पौडेलया प्रस्तावक हे जुयादीगु दु । समर्थकय् धाःसा कैलाश ढुंगेल दु ।

थौं यलया तुल्सीलाल प्रतिस्थानय् प्रदेश नं. ३ या संसदीय दलया नेता ल्ययेगु निंतिं मतदान जुइत्यंगु खः । उम्मेदवारीया निंतिं अष्टलक्ष्मी शाक्यया प्रस्तावकय् पशुपति चौलागाइ व समर्थकय् राजेन्द्रमान श्रेष्ठ दु ।