बञ्चरेडाँडाय् पुसंनिसें फोहर वाइगु

येँ – स्वनिगःया फोहर वायेगु निंतिं दयेकूगु दीर्घकालीन स्यानिटरी ल्याण्डफिल साइट बञ्चरेडाँडाय् वइगु पुसया न्हापांगु वालंनिसें फोहर वाये जीगु खँ धाःगु दु । शहरी विकास मन्त्री कृष्णगोपाल श्रेष्ठं छुं न्हि न्ह्यव ल्याण्डफिल साइटया अवलोकन यासें मंसिर १५ गते निसें हे फोहोर व्यवस्थापन यायेजी कथं ज्या यायेत ठेक्केदार कम्पनीयात निर्देशन बियाथकूगु खः ।

कोरोना महामारीया कारणं व ठेकेदार आलटाल यानाः ज्या दिनाच्वंगु बञ्चरेडाँडाया साइटय थौंकन्हय् तीव्रगतिं ज्या न्ह्यानाच्वंगु खँ मन्त्रालयया प्रवक्ता कृष्णप्रसाद दवाडीं राससयात धयादीगु दु । वय्कलं थौंकन्हय् अन चा मिले यायेगु ज्या जुयाच्वंगु खँ धयादीगु दु ।

थौंकन्हय् स्वनिगःया फोहोर वायेगु थाय् यानातःगु सिसडोलया ल्याण्डफिल साइट जायेधुंकूगुलिं स्वनिगःया फोहर व्यवस्थापन यायेत इलय्ब्यलय् समस्या वयाच्वंगु दु । आः बञ्चरेडाँडाया साइट ज्याख्यलय् वल धाःसा स्वनिगःया फोहोर व्यवस्थापन दीर्घकाल तक अःपुइगु जुइ ।