लुँ तोलां १ लाख थ्यनीन !

येँ -रुस–युक्रेन युद्धया लिच्वः कथं विश्व बजारय् लुँयागु भाः हानं थहां वनेगु शुरु जूगु दु । म्हिगः नेपाःया बजारय् लुँयागु भाः तोलां झण्डै १ लाख थ्यन । म्हिगः नेपाःया बजारय् छापावाल लुँयागु भाः प्रति तोला ९९,९०० तका थ्यंगु खः ।

लुँयागु भावय् थ्व छगू नं न्हूगु रेकर्ड खःसां नेपालय् आः तकया हे दकलय् अप्वःगु भाःया कीर्तिमान धाःसा अझं तोडे जूगु मदुनि । लुँबजाःया विश्लेषक लिसें नेपाल सुनचाँदी व्यवसायी संघया पुलांम्ह नायः तेजरत्न शाक्यं ‘नेपालभाषा टाइम्स’ यात कनादी कथं वि.सं. २०७७ या भदौ महिनाय् लुँया भाः तोलां १ लाख ३ हजार ५०० तका थ्यंगु खः । थ्व कीर्तिमान आः तक तोडे जूगु मदुनि ।

तर विश्लेषक शाक्यं कनादीकथं थौंकन्हय् थहां वनाच्वंगु भाःया ट्रेण्ड स्वयेबलय् थ्व भाः अझ हे थहां वनाः ०७७ या कीर्तिमान तकं तोडे जुइगु खः ला धइथें जुयाच्वंगु दु । युक्रेन व रुस दथुइ तनाव सिर्जना जुइवं विश्व बजारय् लुँयागु भाः थहां वंगु खःसा उकुन्हु रुसी सेना लिहां वन धाःबलय् भाः भचा कुहां वःगु खः । तर आः युद्ध हे छिडे जुल धायेवं भाः थहां वंगु खः । भाजु शाक्यं कनादीकथं विश्व बजारय् लुँयागु भाः प्रति औंश २ हजार डलर तक थ्यनीगु अनुमान जुयाच्वंगु दु । उलि थ्यन धाःसा नेपालय् तोलां १ लाख २ हजार तका थ्यनी ।

मेखे भाः थहां वंगु कारणं नेपालय् लुँ न्याइपिं व तिसा दयेकीपिं म्हो जुया वंगु खँ नं वय्कलं कनादीगु दु । न्हापा नेपाःया बजारय् न्हिं २० किलो तक लुँ खपत जुइगु खःसा आः न्हिं १०–१५ किलोय् कुहां वःगु दु । तिसा दयेकीपिं म्हो जुयाः लुँवहः व्यवसाय नापं प्रभावित जुयाच्वंगु खँ नं वय्कलं कनादिल ।