विश्वया तापमान प्रतिवेदन तयार

येँ – विश्वया तापमान अस्वाभाविक रुपं अप्वया वनाच्वंगु दु । थुकियात कयाः विश्वया आपालं देशं चिउताः नं प्वंका हयाच्वंगु दु ।
थ्व हे झ्वलय् विश्वया तापमान अप्वःगु व उकिया जोखिमयात कयाः प्रतिवेदन तयार याःगु दु । विश्वव्यापी तापक्रम १.५ निसें २ डिग्री सेल्सियस वृद्धि जुल धाःसा उकिं लाके फइगु सम्भावित प्रभाव, जोखिम व उकियात संबोधन याये फकथंया विशेष प्रतिवेदन तयार याःगु खः ।

दक्षिण कोरियाली सहर सोङ्दोय् जलवायु परिवर्तन सम्बन्धी अन्तर सरकारी मंच (आईपिसिसि)या ४८ क्वःगु बैठकं उगु प्रतिवेदन तयार याःगु खः । वन तथा वातावरण मन्त्रालयया कथं वंगु अक्टोबर १ निसें ५ तारिखतक उगु बैठक जूगु खः ।

प्रतिवेदनय् विश्वव्यापी तापक्रम वृद्धियात संबोधन यानाः उत्सर्जनया लँपु व दिगो विकासया लक्ष्य नापं गरिबी न्यूनीकरणया सन्दर्भय् सुदृढीकरणया विषयत दुथ्याकातःगु दु । सन् २०१५ य् पेरिसय् जूगु सम्मेलनं उगु प्रतिवेदन तयार यायेत इनाप याःगु खः ।