उपत्यका प्राधिकरण खारेज यायेमाः – मनपा प्रवक्ता इश्वरमान डंगोल

येँ । उपत्यका विकास प्राधिकरण खारेज यायेमाःगु माग येँ महानगरपालिकां याःगु दु । थौं सोमवाः जूगु पत्रकार नापलायेगु ज्याझ्वलय् न्ववासें येँ मनपाया प्रवक्ता इश्वरमान डंगोलं प्राधिकरण खारेजीया माग यासें आः उकिया लागिं सरकार समक्ष थःपिंसं प्रस्ताव यायेगु खँ नं कनादिल ।

आः देय् संघीय व्यवस्थाय् प्रवेश जुइधुंकूगु व स्थानीय लागाया विकास स्थानीय सरकारं याइ धकाः संविधानय् हे स्पष्ट च्वया तयेधुंकूगु कारणं उपत्यका विकास प्राधिकरण थेंज्याःगु संस्था आवश्यक मजुइधुंकूगु खँ नं वय्कलं कनादिल ।

येँ महानगरपालिकां आः नकतिनि थःपिनि भवन निर्माणसम्बन्धी मापदण्ड संशोधन याःगु खःसा प्राधिकरणया प्रमुख आयुक्त भाईकाजी तिवारीं मनपायात छपु पौ बिसें उगु मापदण्ड संशोधनया निर्णय लित मकाल धाःसा मनपायात कारवाही याये माली धइगु ख्याच्वः समेत बिउगु खः ।

प्राधिकरणया उगु ख्याच्वःयात कयाः प्रवक्ता डंगोलं न्ह्यसः तयादिल, ‘स्थानीय सरकारयात कारवाही यायेमाः धायेगु अधिकार प्राधिकरणयात गनं वल ?’

येँ दुनेया भित्री शहरय् च्वनाच्वंपिं स्थानीय जनताया समस्या समाधान यायेगु लागिं हे मनपां मापदण्ड संशोधन याःगु दावी यासें प्रवक्ता डंगोलं प्राधिकरणं स्वनिगःया स्थानीय जनताया समस्या मथूगु व स्थानीय जनताया समस्या समाधान यायेत येँ मनपां याःगु कुतःयात पनेत स्वयाच्वंगु द्वपं नं बियादिल ।

येँ मनपा दुने थौंकन्हय् ८० प्रतिशत छेँ मापदण्ड विपरित दनातःगु व उकी मध्ये ५०–६० खा छेँयात जक प्राधिकरणं कारवाही याःगु प्रशंग न्ह्यथँसें वय्कलं बाँकी छेँयात छाय् कारवाही मयाःगु धकाः न्ह्यसः नं तयादिल । येँय् थुलिमछि छेँ मापदण्ड विपरित निर्माण जुयाच्वंगुया प्रमुख कारण प्राधिकरण हे खः धासें वय्कलं प्राधिकरणया थ्व गल्ती संशोधन यायेत हे थःपिंसं मापदण्ड संशोधन यानागु खः धयादिल ।
पत्रकारतय्सं न्यंगु न्ह्यसःया लिसः बीगु झ्वलय् वय्कलं विवादास्पद रानीपोखरी पुनर्निर्माणया ज्या आः काष्ठमण्डप मोडेलय् यायेगु बारे सहलह जुयाच्वंगु जानकारी नं बियादिल ।

सम्बन्धित बुखँ

LEAVE YOUR COMMENTS