कोटेश्वर व कलंकीइ स्वनिगलं पिहांवनीपिनि भीड

येँ – सरकारं घोषणा यानातःगु लकडउानया ई ताःहाक जुयाच्वंगु इलय् स्वनिगलं पिहांवनीपिं मनूत ल्याः अप्व जुयावनाच्वंगु दु ।

थ्वहे झ्वलय् थीथी जिल्लाया जनप्रतिनिधितय् संयोजनय् थःथःगु जिल्लाय् च्वंपिं मनूतय्त छेँय् यंकेगु व्यवस्था जूगुलिं मंगलवाः कोटेश्वर व कलंकीइ मनूतय् भीड जूगु दु । कोटेश्वर व जडिबुडी क्षेत्रय् विशेष यानाः दोलखा, रामेछाप, सिन्धुपाल्चोक आदि थासय् वनीपिनि भीड जूगु दु ।

उखे कलंकीइ पश्चिमय् वनीपिं मनूतय् न्हिनय् निसें मुनाः बस पियाच्वंगु दु । अन विशेष यानाः गुल्मि, अग्राखाँची, धनगढी आदि थासय् वनीपिं मनूत अप्व दु ।

थौं स्वनिगः दुने वा वयाच्वंगु जूसां मनूतय् थःथःगु छेँय् वनेगु निंतिं वां दायेका बस पियाच्वंगु दु । स्वनिगलं थःथःगु जिल्लाय् वनेत विशेष यानाः ज्याला मजदुरी याइपिं, विद्यार्थीत अप्व दुगु खँ धाःगु दु ।