राष्ट्रपतिया समीकरण अन्यौलय्

येँ (नेपालभाषा टाइम्स)- सरकार गठन याये न्ह्यः प्रधानमन्त्री पुष्पकमल दाहालं राष्ट्रपति व सभामुख एमालेयात बीगु धकाः बचं ल्हाःगु खःसां आः वयाः बेक्वः खँ ल्हानाहःगु सीदुगु दु ।

सूत्रतय्सं धाः कथं प्रधानमन्त्री दाहालं आः राष्ट्रपति व सभामुख मध्ये छगू पद कांग्रेसयात बी माली धकाः प्रस्ताव तयादीगु दु । छुं न्हि न्ह्यः वय्कलं एमाले अध्यक्ष केपी ओलीलिसे यानादीगु खँल्हाबल्हाय् कांग्रेसयात राष्ट्रपति बी माली धकाः प्रस्ताव यानादीगु खँ धाःगु दु ।

प्रधानमन्त्री दाहालयात कांग्रेसं नं विश्वासया मत बीवं दाहालं थःगु बिचाः हीकाः कांग्रेसयात राष्ट्रपति बी माली धकाः प्रस्ताव तयादीगु खः । तर एमालें धाःसा न्हापा सहमति जू कथं राष्ट्रपति व सभामुख थःपिंत माः धासें कांग्रेसयात बीगु खःसा उपराष्ट्रपति व उपसभामुख बिउसां जिउ धकाः लिसः बिउगु खँ सूत्रं धाःगु दु ।

उपराष्ट्रपति माओवादी थम्हं कयाः उपसभामुख रास्वपायात बीगु सहमति जुइधुंकूगु दु । प्रधानमन्त्री दाहालं लिपा वयाः कांग्रेसयात नं पद बीगु खँ ल्हाना हःगुलिं एमाले वय्कः खनाः सशंकित जूगु खँ सूत्रं धाःगु दु । उकिं राष्ट्रपति पदया चुनावय् माओवादी गज्याःगु भूमिका म्हिती धाये मफुनिगु खँ सूत्रं धाःगु दु ।

थौं जुइगु सभामुखया चुनावय् एमाले उम्मेदवारयात भोट बीगु धकाः माओवादी केन्द्रं निर्णय याना तयेधुंकूगु दु । तर राष्ट्रपति चुनावय् छु यायेगु धकाः माओवादी केन्द्रं छुं धाःगु मदुनि ।

राष्ट्रपति चुनावय् गज्याःगु समी– करण जुइ धकाः धाये मफुनिगु जुयाः सरकारं राष्ट्रपति चुनावया मिति नं तोके मयाःगु खँ सूत्रं धाःगु दु । नापं समीकरण गथे जुइ धकाः धाये मफुनिगु जुयाः आः तक राष्ट्रपतिया उम्मेदवार सु जुइ धकाः तक नं सार्वजनिक याये मफयाच्वंगु खँ सूत्रं धाःगु दु ।

एमालेपाखें उकुन्हु तक राष्ट्रपतिया उम्मेदवार धकाः अष्टलक्ष्मी शाक्य व सुवास नेम्बाङया नां वयाच्वंगु खःसां आः उकी बागमती प्रदेशया पुलांम्ह मुख्यमन्त्री डोरमणि पौडेलया नां समेत स्वाः वःगु खँ सूत्रं धाःगु दु । पौडेलया नां राष्ट्रपति विद्यादेवी भण्डारीपाखें वःगु दावी नं सूत्रं याःगु दु । एमाले दुने राष्ट्रपति पदया लागिं छुं कथंया लबिङ नं मजूनिगु खँ धाःगु दु ।

नेपाली कांग्रेसया महामन्त्री विश्वप्रकाश शर्मां कांग्रेसं प्रस्ताव याःम्ह मनू हे राष्ट्रपति जुइगु दावी यानादीगु दु । म्हिगः संघीय संसद भवन न्हू बानेश्वरय् पत्रकारत लिसे खँ ल्हायेगु झ्वलय् वय्कलं उगु दावी यानादीगु खः ।

राष्ट्रपतिया नितिं प्रधानमन्त्री एवं माओवादी केन्द्रया अध्यक्ष पुष्पकमल दाहालं प्रस्ट लिसः बीधुंकूगु खः ला धकाः न्यंगु न्ह्यसःया लिसः बिसें शर्मां धयादिल, ‘राष्ट्रपति नेपाली कांग्रेसं प्रस्ताव याःकथंया व्यक्ति जुइ, आःयात थुलि जक धाये, थुकी यक्व टिप्पणी यायेगु पाय्छि जुइमखु । आः झी सभामुखया चरणय् दु, सभामुख चरण क्वचायेवं राष्ट्रपतिया ई वइ ।’

सम्बन्धित बुखँ

LEAVE YOUR COMMENTS