‘जिगु उम्मेदवारी धयागु एमालें ल्याय्म्ह पुस्ता, मिसा व सामाजिक अभियान्तायात बिउगु उपहार खः’

येँ (नेपालभाषा टाइम्स)÷ येँ महानगरपालिकाय् एमालेपाखें उपमेयर पदया उम्मेदवार जुइत्यंम्ह सुनिता डंगोलं थःत दकलय् तःधंगु पार्टीं विश्वास याःगु धयागु हे ल्याय्म्ह पुस्तायात बिउगु उपहार खः धयादीगु दु ।

एमालें उपमेयर पदया टिकट बीगु जुइवं छगू वक्तव्य जारी यासें डंगोलं धाःगु दु, ‘देय् दकलय् तःधंगु पार्टीं विश्वास यानाः उपमेयर पदया जिम्मेवारी बिउगु धयागु हे ल्याय्म्ह, मिसा, सामाजिक सांस्कृतिक अभियन्ता लसें सकलें येँया निवासीपिनि भावनायात प्रतिनिधित्व जुइकथं ल्याय्म्हतय्त बिउगु उपहार खः धयागु जिं तायेका । जितः प्रतिनिधि पात्रया रुपय् थनाः जि थेंज्याःपिं क्रियाशिल ल्याय्म्ह व दक्ष मिस्तय्त, सामाजिक सांस्कृतिक अभियन्तात सकसिगुं सम्मान खः ।’

मेयर पदय् दनेगु धकाः चर्चा वयाच्वंम्ह डंगोलयात शनिवाः एमालें उपमेयर पदय् थनेगु क्वःछिउगु खः । छुं नं पार्टीया नां मकासे मेयरय् दनेगु धकाः धयावयाच्वंम्ह डंगोलं थःम्हं एमालें छाय् उपमेयरय् उम्मेदवारी बीत्यनागु धयागु नं स्पष्टीकरण बिसें वक्तव्यय् धयातःगु दु, ‘जिगु उद्देश्य धयागु स्वनिगःयात साँस्कृतिक नगर व राजधानी शहरया रुपय् धाथेंया येँ देय् दयेकेगु खः । उकिं जिं थ्व पालय् थःगु पद स्वयां थःगु लक्ष्ययात तःधं तायेकाः एमाले पाखें उपमेयर पदय् उम्मेदवार जुइगु क्वःछिनागु खः ।’

थः उपमेयर पदय् त्याना वल धाःसा जनताया विश्वास व भरोसायात कुठाराघात मयायेगु व थःत विश्वास यानाः मत बिउपिनि छ्यं गुबलें क्वछुके बीमखु धयागु प्रतिवद्धता नं वक्तव्यय् प्वंकातःगु दु ।

 

सम्बन्धित बुखँ

LEAVE YOUR COMMENTS