ने. सं. ११४४ कौलाथ्व पारू - नःलास्वनेगु

स्वंगू क्षेत्रय् महासंग्राम !

येँ (नेपालभाषा टाइम्स)- थ्वहे वइगु वैशाख १० गते स्वंगू जिल्लाया स्वंगू निर्वाचन क्षेत्रय् जुइगु उपचुनाव अन जुयाच्वंगु प्रचार प्रसारया शैली स्वयेबलय् राष्ट्रिय निर्वाचन थें हे तामझाम जुयाच्वंगु खनेदु ।

खास यानाः बारा, चितवन व तनहुँ जिल्लाया थ्व स्वंगुलिं निर्वाचन क्षेत्रय् राष्ट्रिय स्वतन्त्र पार्टीपाखें स्वम्हं हे विशिष्ट पहःयापिं उम्मेदवार थंगु व चुनावय् प्रशस्त ध्यबा खर्च यानाः प्रचार प्रसार यानाच्वंगु कारणं यानाः नं थ्व चुनाव आम चुनाव थें हे तच्वः जुयाच्वंगु खः ।

थ्व चुनावय् तनहुँलय् रास्वपाया डा. स्वर्णिम वाग्ले, चितवनय् रवि लामिछाने व बाराय् जसपाया उपेन्द्र यादव त्याइगु चर्चा जुयाच्वंसां उमित नं कडा हाथ्या बिउ वयाच्वंगु खनेदु ।

थ्व इलय् देय्या फुक्क हे धइथें तःधंगु सञ्चार माध्यमतय्सं नं थःपिनि ध्यान थ्वहे स्वंगु क्षेत्रय् केन्द्रित यायेधुंकूगु दु । खास यानाः रवि लामिछाने पुचःपाखें सञ्चालित युट्यबरत नं फुक्क धइथें थ्व इलय् चितवनय् केन्द्रित जुयाच्वंगु दु । चितवनय् थ्व इलय् न्ह्याथे यानाः नं चुनाव त्याकेमाः एमालें विशेष बः बियाच्वंगु दु । चितवनया चुनावय् मतदाता प्रभावित यायेत पार्टी अध्यक्ष केपी ओली हे म्हिगः उखे वनीगु ज्याझ्वः दुगु खःसां उसाँय् मदयाः वय्कः उखे वनेगु ज्याझ्वः रद्द जुल ।

चितवनया चुनावय् लामिछानें थुगुसी न्हापा स्वयां नं यक्व ध्यबा खर्च यानाः प्रचार प्रसार यानाच्वंगु खनेदुगु खँ मतदातातय्सं धाःगु दु । अनया चुनावय् खास यानाः सामाजिक सञ्जालय् लामिछानेया विरोध व समर्थनय् यक्व सामग्री वयाच्वंगु खने दुगुलिं चुनावय् मू आकर्षण वय्कः हे जुयाच्वंगु खनेदु । अन वय्कःया हे पद खारेज जूगुलिं हानं चुनाव यायेमाःगु खः ।

हेलिकप्टर छ्यले मदु
निर्वाचन आयोगं बारा, चितवन व तनहुँ जिल्लाय् आः जुइत्यंगु उपनिर्वाचनय् हेलिकप्टर छ्यले मदइगु सुचं पिथंगु दु । चुनावया उम्मेदवारतय्त हेलिकप्टर मछ्लेत निर्देशन बिउगु खः । आयोगं म्हिगः विज्ञप्ति जारी यासें उगु निर्देशन बिउगु खः ।

निर्वाचन प्रचार प्रसारया नितिं निर्वाचन आचार संहिता, २०७९ या दफा १४ खण्ड (छ) स राजनीतिक दलं प्रचार प्रसारया नितिं हेलिकप्टर छ्यले फइगु व्यवस्था दुसां नं उगु व्यवस्था भौगोलिक जटिलता दुगु व विकट थासय् जक हेलिकप्टर छ्यलाः प्रचार प्रसार यायेदइगु उद्देश्यं तयातःगु व आः सतिक वयाच्वंगु उपनिर्वाचन जुइगु थाय् हेलिकप्टर मछ्यसें नं प्रचार प्रसाय यायेफइगु माक्व ई दुगु व यातायातया सहज पहुँच तकं दुगु जुयाः हेलिकप्टर छ्यले म्वाःगु खँ धाःगु दु ।

राजनीतिक दलया उम्मेदवारं सिद्धान्त तकंया प्रतिकूल जुइगु जूगुलिं दलया नेता व सुं नं प्रचारकं हेलिकप्टर सेवा मछ्यलेत नं सुचनय् धयातःगु दु । उकथं हे आचार संहिताया पूर्ण कार्यान्वयनया नितिं सरकारी लिसें निजी हेलिकप्टर सेवा प्रदायकयात नं आयोगया सहमति मकासे निर्वाचन प्रचार प्रसारया नितिं हेलिकप्टर सेवा मबीत नं निर्देशन बिउगु दु ।