ने. सं. ११४६ चाैलागा आमै - माँया ख्वाःस्वयेगु

मरुसतः ३१ गतेनिसें दयेकीगु

येँ – तःभुखाचं पाःताः जुइक दुना वंगु मरुसतः आः थ्वहे वइगु वैशाख ३१ गतेनिसें पुनः निर्माण शुरु याइगु जूगु दु ।
काष्ठमण्डप मरुसतः पुनर्निर्माण समितिया म्हिगः च्वंगु बैठकं थ्व निर्णय याःगु खः । वकुन्हु संस्कृति मन्त्री रविन्द्र अधिकारी लिसें प्रदेशया मन्त्रीत, येँ महानगरपालिकाया मेयर लिसें थीथी जनप्रतिनिधिपिनि उपस्थितिइ छगू क्षमा पुजा यासें पुनर्निर्माणया ज्या न्ह्याकेगु निर्णय नं बैठकं याःगु खः ।

उकथं हे बैठकं थौंकन्हय् मरुया थीथी लागाय् तयातःगु मरुसतःया सिँयात सुरक्षित यायेगु ज्या न्ह्याकेगु निर्णय नं याःगु दु । आः वइगु वैशाख २७, २८ व २९ गते स्वन्हु तक मरुया थीथी लागाय् तयातःगु सिँ ल्ह्ययाः हनुमान– ध्वाखा प्रहरी कार्यालय दुने टहरा दयेकाः तइगु जूगु दु ।

लिसें वकुन्हु हे आर्किटेक्टत सःताः ज्या वःगु व ज्या मवःगु सिँ छुटे यायेगु व ज्या वःगु सिँ नं मरुसतःया छु छु तल्लाय् च्वंगु खः धकाः छुटे यानाः सुरक्षित यायेगु निर्णय जूगु दु । थौंकन्हय् पिने हे तयातःगुलिं नष्ट जुजुं वनाच्वंगु उगु सिँ सुरक्षाया लागिं ल्ह्ययेत स्वयंसेवी जुयाः ज्या इच्छुकपिंत ब्वति कायेत नं समितिं इनाप याःगु दु ।

समितिया ज्यायात चुस्त यायेगु लागिं समितिइ थीथी पदाधिकारी ल्ययेगु ज्या नं म्हिगः जूगु दु । समितिया उपाध्यक्ष पदय् तेजरत्न ताम्रकार, सचिव गौतम डंगोल, कोषाध्यक्ष अशोक वज्राचार्य व उपसचिवय् विभोरलाल श्रेष्ठयात ल्यःगु दु । वंगु वालय् ३ नम्बर प्रदेश सभाया सांसद राजेश शाक्यया अध्यक्षताय् उगु समिति गठन याःगु खः ।

लिसें मरुसतः बारे जानकार विज्ञतय्गु छगू पुचः नं गठन याःगु दु । अथे हे यायेमाःगु थीथी ज्याया लागिं आर्थिक, ज्याकू व्यवस्थापन, डिजायनिङ, प्रचार प्रसार आदि थीथी उपसमितित नं गठन याःगु दु ।३१ गते पुनर्निर्माणया ज्या शुरु जुइधुंकल कि आः वइगु स्वदँत्या निसें प्यदँया दुने मरुसतः दयेके क्वचायेकेगु लक्ष्य समितिं तःगु दु ।

थ्व ज्या जनस्तरपाखें हे यायेगु ताः तयाः उगु समिति गठन याःगु खः । समितियात येँ महानगरपाकालिपाखें माःगु ग्वाहालि चूलाकेगु बचं मेयर विद्यासुन्दर शाक्यं बियादीगु दु ।