पेट्रोलया भाः थकाःगु विरुद्ध नेपाल बन्द घोषणा

येँ- पेट्रोल व ग्याँसया भाः थकाःगु विरोधय् एमाले समर्थित अखिलं म्हिगः आरआर क्याम्पस न्ह्यःने प्रधानमन्त्री शेरबहादुर देउवाया पुत्ला च्याकूगु दु । आयल निगमं बुधवाः जा थुइगु ग्याँसय् ७५ तका, डिजेल व पेट्रोलय् स्वतका भाः थकाःगु खः । प्रदर्शनया झ्वलय् विद्यार्थीतय्सं ‘नाफा घाटा मसिउ, थकाःगु भाः माने याये मखु’ च्वयातःगु प्लेकार्ड ब्वया वःगु खः ।

पेट्रोलियम पदार्थया भाः थकाःगु विरोधय् सत्तारुढ दल समर्थित विद्यार्थी संगठनतय्सं नं विरोध याइगु जूगु दु । सत्तारुढ खुगू विद्यार्थी संगठनं भाः क्वमकाल धाःसा थनिंनिसें आन्दोलन यायेगु ख्याच्वः बिउगु खः । उमिसं म्हिगः उद्योग वाणिज्य तथा आपूर्ति मन्त्रालयया सचिवयात ज्ञापन पौ बिसें तत्काल भाः क्वकायेत माग याःगु खः ।

थ्वहे झ्वलय् माओवादी विप्लव पुचलं थ्वहे वइगु कार्तिक ३० गते नेपाल बन्दया घोषणा याःगु दु । विप्लप पुचलं म्हिगःनिसें चरणबद्ध आन्दोलन यासें ३० गते नेपाल बन्द घोषणा याःगु खः ।