लकडाउन क्वचाःसां जोखिम दनि, लकडाउन अन्तया घोषणा राजनीतिक कारणं जक
येँ (नेपालभाषा टाइम्स) – सरकारं मंगलवाः चान्हय् निसें लकडाउन क्वचाःगु घोषणा याःसां नेपाः अझं जोखिममुक्त अवस्थाय् मथ्यंनिगु खँ सरुवा ल्वय् विज्ञतय्सं धाःगु दु। सरकारं लकडाउन क्वचायेकेगु धकाः याःगु निर्णय राजनीतिक जक जूगु धासें सर्वसाधारण अझं सचेत जुयाः च्वनेमाःगु खँ विज्ञतय्सं सुझाव बिउगु दु ।
राष्ट्रपति विद्यादेवी भण्डरीं नं म्हिगः छगू ट्विट यासें कोरोनाया जोखिम अझं दनिगु खँ धयादीगु दु। वय्कलं नं सरकारं लकडाउन क्वचाःगु घोषणा याःगु जनजीवन सहज यायेत जक याःगु खः धासें अझं महामारीया जोखिम तरे मजूनिगु खँ धयादीगु दु। सरकारं हे नं लकडाउन चायेकूसां महामारीया सम्भावना ल्यंदनिगु खँ धयाच्वंगु दु ।
उकिं नेपाल टेलिकमया रिङ्गटोनय् थौं कन्हय् लकडाउन क्वचाःगु धाःसां महामारी सम्भावना अझं ल्यंदनिगुलिं सचेत जुयाच्वं धयागु सन्देश बिइगु यानाहःगु दु। जनस्वास्थ्य विज्ञतय्सं ‘लकडाउन क्वचाल’ धयागु जक चर्चा जुयाच्वंगुलिं थुकिं सर्वसाधारणयात गलत रुपं सन्देश वनी धयागु खँय् चिन्ता प्वंकूगु दु ।
जनस्वास्थ्य विज्ञ डा. शरद वन्तया कथं गुकथं ‘लकडाउन क्वचाल’ धकाः चर्चा जुयाच्वंगु दु उकिं सावधानी नालेमाः धयागु खँयात लिउने लाकाबिउगु दु। थुकिं झन जोखिम अप्वयेका बिउगु दु। वय्कलं धयादीगु दु, ‘लकडाउन क्वचायेकेगु छगू राजनीतिक निर्णय जक खः । कोरोनापाखें झी अझं सतर्क जुइमाःगु यक्व हे कारणत दनि ।’
विज्ञतय्सं छगू इलय् वयाः लकडाउन क्वचायेकेमाः धयागु खँ विमती मदुगु धासें तर थुकिया सन्देश आः खतरा मन्त धयागु कथं वनेमजिउ धाःगु दु। डा. वन्तं धयादी, ‘लकडाउन क्वचाल धयागु अर्थ नियमित जीवनशैलीइ लिहां वंसां जिल धयागु सन्देश वन धाःसा व गलत जुइ ।’
स्वास्थ्य मन्त्रालयया प्रवक्ता डा. जागेश्वर गौतमं नं लकडाउन छगू विशेष उद्देश्यं तयेमाःगु खँ धासें धयादी, ‘थ्व इलय् झीसं मनूतय्त सचेत यायेगु लिसें थःपिनिगु स्रोत, पूर्वाधार व संयन्त्र विकास यानागु दु। लकडाउन थज्याःगु तयारी यायेगु निंतिं ई कायेगु तरिका जक खः धयागु थुइकेमाः ।’
प्रवक्ता गौतमं हे अन्तर्राष्ट्रिय उडान चालेधावं नेपाः वइपिनिगु व्यवस्थापन यायेत तःधंगु हाथ्या वइगु खँ धयादी । वय्कलं धयादी, ‘छम्ह जक संक्रमितं नं महामारी न्यंकेत मिपुसा थें ज्या याइ धयागु झीसं बांलाक हे स्यू ।’
सरकारं कोरोना संक्रमण सम्बन्धी सूचकत सुधारोन्मुख खनेदुगुलिं व लकडाउन तसकं ताःहाकः जुयावनाः राज्यया फुक्क गतिविधि ठप्प जुयाः व्यवहारिक रुपं समस्या वःगुलिं लकडाउन चिकेमाःगु खँ धासें प्यला न्ह्यव निसें जारी लकडाउनयात मंगलवाः चान्हय् १२ बजे निसें क्वचाःगु घोषणा याःगु खः ।
LEAVE YOUR COMMENTS