इरानलिसे वार्ता यायेगु ट्रम्पया घोषणा, कच्चा चिकंया भाः कुहां वल
एजेन्सी – अमेरिकी राष्ट्रपति डोनाल्ड ट्रम्पं इरानलिसे वार्ता याइगु जूगु दु । छवाः न्ह्यःतक इरान विरुद्ध कडा रुपं प्रस्तुत जुया सैन्य आक्रमण यायेगु ख्याच्वः बिया वयाच्वंम्ह अमेरिकी राष्ट्रपति ट्रम्पं आकाझाकां छक्वलं क्वमिलु जुयाः वार्ता यायेगु घोषणा याःगु खः । ट्रम्पं वार्ताया घोषणा यायेवं इरानलिसे वार्ता यायेगु व सम्झौता (सम्भवतः) या ड्राफ्ट तकं तयार जुइधुंकूगु दावी याःगु दु ।
ट्रम्पं इरानलिसे वार्ता यायेगु घोषणा यायेवं थुखे अन्तर्राष्ट्रिय बजारय् कच्चा चिकंया भाः नं कुहां वःगु खः । ट्रम्पया घोषणालिसें चिकं ढुवानीया निंतिं रणनीतिक ल्याखं महत्वपूर्ण होर्मुज जलमार्गपाखें चिकंया आपूर्ति पूर्णरुपं सहज जुइगु विश्वासया लिसें कच्चा चिकं भाः कुहां वःगु खः ।
इरानलिसे वार्ता यायेगु घोषणा लगत्तै सोमवाः न्हिनय् अन्तर्राष्ट्रिय बजारय् कच्चा चिकंया भाः ६ प्रतिशततक कुहां वःगु खः । अन्तर्राष्ट्रिय बजारय् डब्लुटीआई क्रुड आयल (कच्चा चिकं) या भाः ६.३७ प्रतिशत कुहां वयाः प्रति ब्यारेल ७९.२८ अमेरिकी डलरय् कुहां वःगु दु । थुकथं हे ब्रेन्ट क्रुड आयलया भाः नं ५.५४ प्रतिशत कुहां वयाः प्रति ब्यारेल ८३.०७ अमेरिकी डलर थ्यंगु दुसा मुर्बान क्रुड आयलया भाः नं ६.५७ प्रतिशत कुहां वयाः ७९.८७ अमेरिकी डलर थ्यंगु दु ।
अन्तर्राष्ट्रिय बजारय् चिकंया भावय् वःगु हिउपालं विश्वन्यंकं प्रशोधित चिकंया भावय् लिच्वः लाकेगु यानाच्वंगु दु । अथे खःसा नेपालय् नेपाल आयल निगमं आइतवाः चान्हसिया इलंनिसें पेट्रोलियम पदार्थया भाः थकाःगु दु ।
थ्व हे झ्वलय् मेगु छगू समाचारकथं होर्मुज जलमार्ग खुल्ला मजूगु इरानं स्पष्ट याःगु दु । ओमानलिसे न्हूगु समुद्री यातायात मार्गसम्बन्धी जूगु प्राविधिक समझदारीयात कयाः होर्मुज जलमार्ग हाकनं संचालन जुइत्यंगु धइगु खँयात अस्वीकार यासें इरानं होर्मुज अझं बन्द हे जुयाच्वंगु व तत्कालया निंतिं चायेकेगु धइगु निर्णय पूर्णरुपं बिस्कं विषय जूगु खँ स्पष्ट याःगु दु ।
होर्मुज जलमार्ग बन्द जुयाच्वंगुया कारण अमेरिकी नाकाबन्दी, सम्झौताया उल्लंघन व थःपिं विरुद्ध जारी शत्रुतापूर्ण गतिविधि हे मुख्य जिम्मेवार जूगु इरानया ठहर दु ।
इरानी विदेश मन्त्रालयया प्रवक्ता इस्माइल बाघाईं ओमानलिसेया सहमति सुरक्षित समुद्री जलमार्ग व्यवस्थापनया निंतिं आवश्यक प्राविधिक पूर्वसर्त जक जूगु इरानया सरकारी संचारमाध्यम आरआरआईबीयात बिउगु छगू अन्तर्वार्ताय् धाःगु दु । प्रवक्ता बाघाईं थुकियात होर्मुज जलमार्ग हाकनं चायेकेगु निर्णय जूगुया रुपय् काये मिले मजूगु नं धाःगु दु ।
इरान गुगुं नं बाह्य दबाबापाखें प्रभावित जुइमखु धासें बाघाईं अमेरिकी अधिकारीतय्सं लिपांगु इलय् बिउगु अभिव्यक्ति व ख्याच्वलं इरानया नीतिइ छुं नं हिउपा मवइगु व इरानया राष्ट्रिय सुरक्षा व राष्ट्रिय हितया लिधंसाय् जक निर्णय जुइगु नं अन्तर्वार्ताय् धाःगु दु ।
LEAVE YOUR COMMENTS