‘नुगः चफुना’ या म्यूजिक भिडियो पिदन
येँ (नेपालभाषा टाइम्स)- न्याला खुलाति न्ह्यः ‘लहिना तयागु दुघाः’ बोलया म्ये हालाः संगीतख्यलय् पलाः न्ह्याकूम्ह गायिका नानीशोभा महर्जनया न्हूगु म्ये ‘नुगः चफुना’या म्युजिक भिडियोया पितब्वज्या शनिबाः जूगु दु । संसार्स क्रियसन्सया ग्वसालय् जूगु ज्याझ्वलय् संगीतख्यलय् नुगः क्वसाःम्ह म्येहालामि व समाजसेवी सरिता महर्जन मूपाहांकथं झायादीगु खः ।
मयजु महर्जन संसार्स क्रियशन्सया संसार संगीतालयया संरक्षक नं खः । अथेहे ज्याझ्वलय् संसार्स क्रियशन्सया सल्लाहकार विजयरत्न असंबरे विशिष्ट पाहाँकथं झायादीगु खः । थ्व म्युजिक भिडियो पवन जोशीया निर्देशनय् पिहांवःगु १२४ गूगु म्युजिक भिडियो खः । राजेन्द्र शाक्यं लसय् हनादीगु थ्व म्येया निंतिं संगीतज्ञ नापं साउण्ड विशेषज्ञ दिप तुलाधरं बाजं ग्वसाः ग्वयादीगु खः ।
थ्व म्ये च्वयादीम्ह नानी शोभा महर्जन खः । थुकी राजेश श्रेष्ठ व नानी शोभा महर्जनया हे मू भुमिका दुसाः मीरा डंगोल, जयलक्ष्मी सिद्धि बज्राचार्य, प्रेम कार्कीलिसें संगीतज्ञ रत्न बेहोशीं पाहां कलाकार कथं अभिनय यानादीगु दु । थ्व म्यूजिक भिडियोया किपालुमि व सम्पादनय् राजेश शाक्य, सहनिर्देशनय् सुरेन्द्र श्रेष्ठ व निर्माताय् नानी शोभा महर्जन नां बियातःगु दु ।
ज्याझ्वलय् मूपाहां लगायतया पाहांपिंसं नेपालभाषाया संगीतख्यलय् म्युजिक भिडियोया भूमिकायात कया थःथःगु बिचाः प्वंकादीगु खः ।
LEAVE YOUR COMMENTS