चीनया निंतिं जासुसी याःगु द्वपनय् सिआईएया पूर्व कर्मचारी ज्वन

एजेन्सी – अमेरिकाया केन्द्रीय गुप्तचर निकाय सीआईया छम्ह पुलांम्ह कर्मचारीयात चीनया निंतिं जासुसी याःगु द्वपनय् ज्वंगु दु। एजेक्ज्यान्डर युक चिङ मा नांया ६७ दँया सिआइएया पुलांम्ह कर्मचारीं थः छम्ह थःथितिलिसे जानाः चीनया निंतिं जासुसी याःगु द्वपं बिउगु दु । उम्ह थःथिति नं सिआईएया हे कर्मचारी जूगु खँ धाःगु दु ।

अमेरिकी न्याय मन्त्रालयं पितबिउगु वक्तव्यय् वं राष्ट्रिय सुरक्षा सम्बन्धी बर्गीकृत सुचं चिनियाँ गुप्तचरतय्त बिउगु खः । चीन व अमेरिका दथुइ तनाव तच्वया वनाच्वंगु इलय् जासुसीया द्वपनय् ज्वंम्ह उम्ह मनू आःतकया दकलय्म हत्वपूर्ण व्यक्ति जूगु खँ धाःगु दु। चिब मा दोषी ठहर जुल धाःसा वयात आजीवन कारावास जुइफु धाःगु दु ।

हङकङय् बूम्ह चिब मा अमेरिकाया अंगीकृत नागरिक जुइधुंकूम्ह खः । वं सन् १९८२ निसें सिआइएय् ज्या यायेगु सुरु याःगु खः । ज्या याःगु न्हय्दँ लिपा सिआइएय् त्वःताः चीनया सांघाइलय् च्वंवंगु खःसा सन् २००१ य् हाकनं अमेरिका लिहां वःगु खः । अमेरिका लिहां वयेधुंकाः छगू दशक तक वं चीनया निंतिं जासुसी याःगु द्वपं बियातःगु दु। उमिसं सिआइएया कर्मचारी, उमिगु गतिविधि व संचारयात गुकथं गोप्य यानातइ धयागु बारे चिनियाँ पक्षयात जानकारी बिउगु खः ।