ने. सं. ११४६ बछलागा तृतीया -

गंल्वय् सम्बन्धी सचेतना ज्याझ्वः

थिमि – नेपाल क्षयरोग निवारण संस्था ख्वप शाखाया ग्वसालय् गंल्वय् सम्बन्धी सचेतना ज्याझ्वः जुल । राष्ट्रिय क्षयरोग केन्द्र ख्वपया ग्वाहालिं थीथी समुदायया मिसातय्त लक्षित यानाः उगु ज्याझ्वः याःगु खः ।संस्थाया निवर्तमान नायः बाबुकाजी श्रेष्ठं लसकुसलिसें संस्थाया म्हसीका बियाः न्ह्याःगु ज्याझ्वलय् दुजः रवि श्रेष्ठं ज्याझ्वःया उद्देश्ययात कयाः जानकारी बियादीगु खः ।

थिमि हेल्थ पोष्टया इन्चार्ज रञ्जनाकुमारी शाहं गंल्वय् छेँया न्ह्याम्हं दुजःपिंत जुइफु धासें इमिसं छेँय् च्वंपिंत धाये मफयाच्वंगु अवस्थाय् मेपिंत नं पुनीगु सम्भावना दुगु व थ्व ल्वचं कइगु कारण, उकिया उपचार व मिसात सचेत जुइमाःगु बारे प्रशिक्षण बियादीगु खः ।
प्रशिक्षणय् थिमि बालकुमारी स्वास्थ्य समाज, प्रिज्म साकोस, मिसा स्वयंसेविका समिति, जनप्रेमी कलेजया विद्यार्थी व कपाली समाजया मिसातय् सहभागिता दुगु खः ।