मिसा खलकं मोतिलक्ष्मीया बुन्हि हन
येँ – नेपालभाषा मिसा खलःया संस्थापक नायःलिसें नेपाःया हे दकलय् न्हापांम्ह मिसा बाखं च्वमि मोतिलक्ष्मी उपासिकाया १०९ दँ बुदिं छगू ज्याझ्वःया दथुइ हंगु दु । खलःया नायः मंगला कारंजितया सभापतित्वय् जूगु ज्याझ्वलय् खलःया पुलांम्ह नायःलिसें संरक्षक सुवर्णकेशरी चित्रकार झायादीगु खः ।
मूपाहां चित्रकारं खलःया संस्थापक नायः मोतीलक्ष्मीया किपाय् स्वांमाः देछासे त्वाःदेवाय् मत च्याकाः उलेज्या यानादीगु ज्याझ्वलय् खलःया न्वकु धर्मशोभा तुलाधरं लसकुस यानादीगु खः । ज्याझ्वलय् नवासें मूपाहां चित्रकारं नेपाःया न्हापांम्ह मिसा बाखंच्वमि नापं साहित्यकार मोतीलक्ष्मी उपासिका छम्ह साहित्यिक, धार्मिक व सामाजिक परिवर्तनकारी व्यक्तित्वः जूगु धासें वय्कःया योगदानयात समाजं न्ह्याबलें लुमंका तयेमाः धयादिल ।
ज्याझ्वःया सभापतिलिसें खलःया नायः कारंजितं ने.सं. ११०९ निसें ११११ तक खलःया नेतृत्व यानादीम्ह वय्कः ने.सं. १११७ य् मदयेधुंकाः खलकं दँय्दसं वय्कःया लुमन्तिइ उकथं बुदिं न्यायेका वयाच्वंगु जानकारी बियादिल ।
लिसें वय्कलं ने.सं. ११२७ य् मोतिलक्ष्मीया १०० दँ बुन्हिया लसताय् खलकं छवाःयंकं थीथी ज्याझ्वः यासें बुन्हि हनागु नापं मिसा खलःया जिभिभलसा छेँ जग्गा दाता युदीमाया तुलाधर, अग्रणी भिक्षुणी धम्मावती गुरुमां व संस्थापक नायः मोतिलक्ष्मी उपासिकापाखें शिलान्यास यायेगु ज्या जूगु नं जानकारी बियादीगु खः ।
थुकथं हे मोतिलक्ष्मीया सछिदँ बुन्हिया लसताय् लाकाः खलःपाखें जनस्तरं नेपाःमि मिसाया नामं वय्कःया किपा व मिसा खलःया लोगो दुथ्याःगु वहःया पाँय्म्वः पिथनेत सफल जूगु धयादिल ।
ज्याझ्वलय् खलःया पदाधिकारीपिं निर्मला तुलाधर, पद्मलक्ष्मी ताम्रकारं नं नुगःखँ प्वंकादीगु ज्याझ्वलय् सुभाय् देछासें खलःया लिउछ्यांजे प्रा. प्रेमहिरा तुलाधरं मोतीलक्ष्मीया साहित्यिक व सामाजिक योगदानया बारे कनादीगु खः ।
LEAVE YOUR COMMENTS