चीन-भारतया नेतात नेपाः वइगु

नेपाःया राजनीतिक घटनाय् चीन व भारतया थःथःगु नीति

येँ (नेपालभाषा टाइम्स)- नेपालय् संसद विघटन जुयाः ब्वलंगु राजनीतिक अवस्थाया कारणं जःलाखःला देय् भारत व चीनया नेपाः केन्द्रित गतिविधि अप्वया वःगु दु । थ्व घटना विकसित जुइवं नेपाःया लागिं चीनया राजदूत होउ यान्छीं राष्ट्रपति विद्या भण्डारींनिसें कयाः पुलांम्ह सभामुख कृष्णबहादुर महरा तकयात नापलानाः खँल्हाबल्हा यानादीगु धुंकूसा भारतीय राजदूत विनयमोहन क्वात्रा नेपाःया लिपांगु घटना बारे ब्रिफिङ यायेगु लागिं म्हिगः न्हूदिल्ली प्रस्थान जुयादीगु दु। वंगु झिंन्यान्हुया दुने भारतीय राजदूतया थ्व निक्वःगु दिल्ली दौड खः । चिनियाँ राजदूत यान्छीं नापलाःपिं नेकपा निगुलिं खेमाया नेतातय्त आः थ्व पार्टी हानं एकीकृत जुइ फइ ला धकाः न्ह्यसः तयेगु यानाच्वंगु दु ।

थ्वहे झ्वलय् नेपाःया अवस्थापाखें चिन्तित जुसें चिनियाँ कम्युनिष्ट पार्टी अन्तर्राष्ट्रिय विभागया उपमन्त्री गुओ यैचौया नेतृत्वय् छगू पुचः थौं नेपाः वयेत्यंगु खँ सीदुगु दु । संसद विघटन लिपा नेपाः वयेत्यंगु थ्वहे न्हापांगु विदेशी पुचः खः । सूत्रतय्सं धाः कथं भारतीय गुप्तचर संस्था ‘र’ या प्रमुख, भारतीय सेनाया सेनापति, भारतीय विदेश मन्त्रालया सचिव व भारतीय जनताया पार्टीया वरिष्ठ नेता नेपाः वयाः लिहां वनेवं हे नेपालय् संसद भंग जूगु कारणं उकियात चीनं अर्थपूर्ण रूपं कयाच्वंगु दु । नेपालय् विकसित थ्व घटनां यानाः नेपालय् चीनं यानातःगु व आः यायेगु धकाः तयारी जुयाच्वंगु आर्थिक लगानीया भविष्य छु जुइ धइगु खँय् चीन अन्यौलय् लानाच्वंगु खँ नं सूत्रं धाःगु दु ।

थ्वहे झ्वलय् भारतपाखें नं छगू प्रतिनिधि मण्डल नेपाः वयेगु तयारी जुयाच्वंगु खँ सीदुगु दु । सम्भवतः भारतीय जनता पार्टीया पुलांम्ह नायः लिसें गृहमन्त्री अमित शाह हे नेपाः वयेफुगु खँ सूत्रतय्सं धाःगु दु ।

ओली नं भारत वनीगु ?
प्रधानमन्त्री केपी ओलीं यानादीगु संसद विघटनाय लिउने भारतया ल्हाः दयेमाः धकाः राजनीतिक ख्यलय् चर्चा जुयाच्वंगु हे इलय् प्रम ओलीं याकनं हे भारत भ्रमण यानादीत्यंगु खँ नं पिदंगु दु। वय्कलं थ्वहे वइगु पुस २० गतेपाखे भारत भ्रमण यानादीत्यंगु खँ थन पिदनाच्वंगु दु । तर सरकारी निकायपाखें उकिया पुष्टि धाःसा याःगु मदुनि । प्रम ओलीया थ्व भ्रमण सम्बन्धी चर्चां यानाः वय्कलं यानादीगु संसद विघटनया लिउने भारतया ल्हाः दयेमाः धकाः जुयाच्वंगु अनुमान सत्य साबित जू वनीगु बिचाः नं तयेगु याना हयाच्वंगु दु। लिसें वय्कः थ्व इलय् कामचलाउ सरकारया प्रमुख जक जुयादीगु कारणं कामचलाउ प्रधानमन्त्रीं विदेश भ्रमण याये जिउ लाकि मजिउ धइगु न्ह्यसः नं पिदनाच्वंगु दु ।