स्वला लिपा बञ्चरेडाँडा : स्वनिगःया फोहोर वायेगु समस्या न्यय्दँया निंतिं मदइगु

येँ (नेपालभाषा टाइम्स) – स्वनिगः लागाया फोहोर व्यवस्थापनया लागिं नेपाः सरकारं नुवाकोटया बञ्चरेडाँडाय् दयेकाच्वंगु न्हूगु डम्पिङ साइत आः वइगु स्वला लिपा सञ्चालनय् हयेगु अन्तिम तयारी शुरु जूगु दु। थ्व डम्पिङ साइट दयेकेगु लागिं थौंकन्हय् न्ह्यानाच्वंगु ज्याय् यदि छुं अवरोध मवल धाःसा स्वला लिपा थ्व सञ्चालन जुइगु खँ शहरी विकास मन्त्रालय सूत्रं धाःगु दु ।

यदि थ्व डम्पिङ साइत दयेके सिधल धाःसा स्वनिगःया फोहोर वायेगु लागिं मेगु ५० दँ तक निं समस्या मजुइगु खँ धाःगु दु। यदि फोहोर च्याकाः उर्जा पिकायेगु मेशिन प्रयोग यात धाःसा मेगु १०० दँ तक फोहोर वायेगु समस्या मदइगु अनुमान यानातःगु दु ।

उखे येँ महानगरपालिकाया वातावरण विभागया प्रमुख हरिकुमार श्रेष्ठं धाःसा यदि बांलाक ज्या याःसा स्वला दुने सञ्चालनय् वयेफु खःसां नं आः अन जुयाच्वंगु ज्या स्वयेबलय् स्वलां ज्या क्वचाइगु सम्भावना मदुगु खँ कनादिल । ‘नेपालभाषा टाइम्स’ लिसे खँ ल्हासें वय्कलं धयादिल, ‘याःसा ला यायेफु, तर अझं विश्वस्त जुइ मफुनि ।’

छुं ई न्ह्यः लकडाउनं यानाः स्वनिगलय् फोहोर उत्पादन कम जूगु खःसां लकडाउन खुले जूगुया नापनापं फोहोर उत्पादन नं हानं न्हापा थें हे शुरु जूगु खँ नं वय्कलं कनादिल ।

सिसडोल बन्द यायेगु तयारी
बञ्चरेडाँडाय् न्हूगु डम्पिङ साइत निर्माणया ज्या अन्तिम तयारीइ थ्यनेवं थौं कन्हय् स्वनिगःया फोहोर वायेगु लागिं प्रयोग जुयाच्वंगु सिसडोलया डम्पिङ साइत बन्द यायेगु तयारी नं शुरु जूगु दु। येँ महानगरपालिकां सिसडोल डम्पिङ साइत बन्द यायेगु लागिं अध्ययन शुरु याःगु खँ सीदुगु दु। थ्व डम्पिङ साइत बन्द यायेवं अन मुनाच्वंगु फोहोर फुक्कं चां त्वपुनाः पहाड थें तयेगु ज्या जुइ । लिसें अन सिमा पिनाः जंगलया स्वरुप बीगु खँ धाःगु दु ।

सिसडोलया डम्पिङ साइत थौं कन्हय् पूवंक हे जायाः आः अन फोहोगु वायेगु थाय् हे मदयेधुंकूगु दु। सिसडोलय् थ्व दँय् हे फोहोर वायेगु अवस्था मदयेधुंकूगु खःसां ताः ई बन्द जुयाः यक्व फोहोर उत्पादन मजूगुलिं छुं भचा राहत महसुस जूगु खँ मनपा वातावरण विभागया प्रमुख हरिकुमार श्रेष्ठं ‘नेपालभाषा टाइम्स’ यात कनादिल । अन फोहोरै फोहोरया तजाःगु पहाड बने जुयाः आः अन गाडी तकं यंके मफयेधुंकूगु खँ नं वय्कलं कनादिल । ‘आः स्थानीय जनता हाः वःगु कारणं जक मखु, थाय् हे मदयेधुंकूगु कारणं नं सिसडोलय् फोहोर वाये फइगु अवस्था मदु’ श्रेष्ठं कनादिल ।