शंखघर साख्वा सामाजिक न्यायको प्रतिक
यल – नेपाःया मौलिक संवत् नेपाल संवत्या प्रवर्तक राष्ट्रिय विभूति शंखधर साख्वाः सामाजिक न्यायया प्रतीक जूगु खँ थन जूगु छगू ज्याझ्वलय् व्यक्त याःगु दु । थौं स्वयां ११३९ दँ न्ह्यः शंखधर साख्वालं गरिब नेपाःमि जनताया त्यासा पुलाः सामाजिक न्याय् तःधंगु योगदान बिउगु खँ धाःगु दु ।
नेपाल संवत् ११४० न्हूदँया लसताय् ताम्रकार समाजं ग्वसाः ग्वःगु भिंतुना कालबिल व तुच्चा ज्याझ्वलय् नवासें प्रतिनिधिसभा सदस्य पम्फा भुसालं उगु खँ धयादीगु खः । सांसद भुसालं शंखधरं गरिब नेपाःमि जनताया त्यासा पुलाः सामाजिक न्याय् तःधंगु ज्या याःगु धासें शंखधर लगायत अग्रजतय् म्हगस पूवंकेत, यल देय्या कला, सम्पदा, संस्कृतिया संरक्षण, संवद्र्धन यायेत यल नगरयात सांस्कृतिक राजधानीया रुपय् न्ह्यःने यंकेग अवधारया पेश यानागु धयादिल ।
जावलाख्यलय् च्वंगु समाजया भवनय् जूगु ज्याझ्वलय् यल महानगरपालिकाया प्रमुख चिरिबाबु महर्जनं यल देय्या सम्पदा, संस्कृतिया संरक्षण व संवद्र्धनया निंतिं यल मनपा न्ह्यचिलाच्वंगु दु धासें आः वइगु दिनय् महानगरपालिकां नेपाल संवत्या छ्यलाबुला नियमित रुपं याना यंकेगु प्रतिवद्धता प्वंकादिल ।
समाजया नायः रविन्द्रराज ताम्रकारं राज्यं हे नेपाल संवत्यात राष्ट्रिय संवत् व शंखधरया राष्ट्रिय विभूति घोषणा यायेधुंकूगु अवस्थाय् थुकिया व्यापक प्रचार प्रसार व छ्यलाबुलाया निंतिं सरोकारवाला निकायत न्ह्यःने न्ह्याः वनेमाः धयादिल ।
नेवाःतय् आदिभूमि स्वनिगलय् नेवाःत हे अल्पमतय् लाना वनाच्वंगु अवस्थाय् सकलें नेवाःत छप्पँ जुयाः न्ह्याः वनेगु बाहेकं मेगु विकल्प मदु धासें वय्कलं नेवाः समुदायया अस्तित्व हे न्हंकेकथं सरकारं हःगु गुथि विधेयक विरुद्ध गुकथं नेवाः समुदाय छधी छप्पँ जुयाः कुहां वःगु खः आः नेवाःतय् मेमेगु मुद्दाया मामिलाय् नं उकथं हे छधी जुयाः न्ह्याः वनेमाः धयादिल ।
ज्याझ्वलय् प्रदेशसभा सदस्य शोभा शाक्य, नेपाल संवत् न्हूदँ राष्ट्रिय समारोह समिति–११४०या नायः रमेश महर्जन, नेपालभाषा मंकाः खलः यलया नायः ऋषिप्रसाद श्रेष्ठ, नेपाल राष्ट्रिय खड्गी समाज यल जिल्ला नायः अरोज खड्गी, समाजया मूछ्याञ्जे शम्भुगोविन्द ताम्रकार, दांभरिं दिपेश ताम्रकार लगायतं थःथःगु नुगःखँ तयादीगु खः ।
उगु ज्याझ्वलय् प्रतिनिधि सभा सदस्य कृष्णलाल महर्जन, प्रदेशसभा सदस्य राजकाजी महर्जन, ज्ञानेन्द्र शाक्य, महानगर उपप्रमुख गीता सत्याल, प्रहरी उपरीक्षक दुर्गा सिंह, उद्योग वाणिज्या महासंघया नायः कृष्णलाल महर्जनलिसें थीथी जातीय संगठनया प्रतिनिधितय्गु उपस्थिति दुगु खः ।
LEAVE YOUR COMMENTS