प्यंगू लाख स्मार्ट कार्ड हल

येँ – यातायात व्यवस्था विभागं प्यंगू लाख ‘स्मार्ट कार्ड’ चालक अनुमति पत्र हःगु दु । सरकारं १० गू लाख स्मार्ट कार्ड न्याःगु खःसा न्हापांगु चरणय् प्यंगू लाख हःगु खः । ल्यं दुगु कार्ड नं याकनं हे हयेगु ज्या जुइगु विभागं न्ह्यथंगु दु । विभागया प्रवक्ता तीर्थराज खनालं सरकारं ‘ग्लोबल टेण्डर’ प्रक्रियापाखें न्याःगु १० गू लाख मध्ये प्यंगू लाख स्मार्ट कार्ड थ्यंकः वःगु व ल्यं दुगु कार्ड नं याकनं हे हयेगु जुइ धयादिल ।

पर्याप्त मात्राय् कार्ड हयेगु ज्या जुइवं उकिया नियमित व मेशीनया क्षमताकथं कार्ड छापे यायेगु ज्या नं शुरु जुइगु वय्कलं धयादिल ।
सरकारं थनिं प्यदँ न्ह्यवनिसें स्मार्ट कार्ड चालक अनुमतिपत्र वितरण न्ह्याकूगु खः । देय्न्यंकंया दक्वं यातायात व्यवस्था ज्याकूपाखें सवारी चालक अनुमति पत्रया निंतिं परीक्षा उत्तीर्ण याःपिंत विभागं उकथंया स्मार्ट कार्ड चालक अनुमति पत्र बिया वयाच्वंगु दु ।

अथे खःसां चालक अनुमति पत्रया निंतिं परीक्षा उत्तीर्ण याःपिं व नविकरणया निंतिं राजस्व तकं पुलेधुंकूपिं द्वलंद्वःया ल्याखय् सेवाग्राहीं आतक नं उकथंया कार्ड काये खनाच्वंगु मदु । सेवाग्राहीतय्सं वंगु दछि न्ह्यवंनिसें स्मार्ट कार्ड काये खनाच्वंगु मदु ।

सरकारं छुं दिं न्ह्यः जक स्मार्ट कार्ड छापे यायेत ‘मास प्रिन्टर’ मेशीन हःगु खःसा व स्वयां न्ह्यः विभागयाके थःके हे दुगु मेशीनं स्मार्ट कार्ड छापे याना वयाच्वंगु खः । विभागयाके दुगु मेशीनं आवश्यककथं कार्ड छापे यायेगु क्षमता मदुगुलिं सेवाग्राही अनुमतिपत्र काये मखनाच्वंगु खः । मास प्रिन्टरं घौछिया दुने न्यासः कार्ड छापे यायेगु क्षमता दु ।