मानन्धर संघया न्हय्सः साय्मि भ्वय् क्वचाल

येँ(नेपालभाषा टाइम्स)÷केन्द्रीय मानन्धर संघया तत्वावधानय् थुगुसीया स्वयम्भू भ्वय् (न्हय्सः साय्मि भ्वय्) वंगु शनिवाः तःजिक क्वचाल । दँय्दसं होलिपुन्हि धुनेवं न्हापांगु शनिवाः न्यायेका वयाच्वंगु स्वयम्भू भ्वय् स्वयम्भू भुइख्यलय् जूगु खः ।

संघया सभापति मनोज मानन्धरया सभापतित्वय् जूगु ज्याझ्वलय् उपसभापति बद्रीनारायण मानन्धरं लसकुस यानादीगु ख । थुगुसीया भ्वय्या व्यवस्थापन किपूया श्रीपंचमि मानन्धर गुथि कुतिसाः त्वाःपाखें जूगु खःसा थुगुसीया भ्वजय् स्वनिगः व स्वनिगलं पिनेया थीथी त्वाः, गुथि, खलःया झण्डै झिप्यसः साय्मितय् सहभागिता दुगु खः ।

मानन्धर समुदायया ऐतिहासिक महत्वया थुगु भ्वय्या दथुइ थुगुसी इहिपा यानादीपिं न्हू तिपूयात दसिपौ नं लःल्हाःगु खःसा ज्याझ्वलय् आकिवं स्वयम्भू भ्वय्या व्यवस्थापन यायेगु पाःकथं मच्छेगां मानन्धर गुथियात पाःब्व पौ नं लःल्हाःगु खः ।

कोरोना भाइरस संक्रमणयात ध्यानय् तयाः थुगुसी नियमित व आवश्यक ज्याखँ जक यायेकथं जूगु भ्वजय् हिदान ज्याझ्वः नं जूगु खःसा न्हू इहिपा यानादीपिं भौमस्तय् दथुइ म्युजिकल चियर कासा नं जूगु खः । कासाय् न्हाप जुयादीम्हेयात पोखरा भ्रमण टिकट संघया सभापति मनोज मानन्धर व लिउ लाःम्हेसित यात उपसभापति बद्रीनारायण मानन्धरं गिफ्ट ह्याम्पर लःल्हानादीगु खः ।

मानन्धर समुदायया ऐतिहासिक स्वयम्भू भ्वजय् दँय्दसं छगू छगू त्वाः, गुथिपाखें व्यवस्थापन यायेगु याना वयाच्वंगु दुसा भ्वजय् आवश्यक जुइगु बजि, मरि, ख्येँ, खाय् व धौ, तरकारि, अय्लाः थ्वँ, लगायतया नसात्वँसा ज्वलं व्यवस्थापन छगू छगू त्वालं याना वयाच्वंगु दु ।