स्वनिगलय् पिसिआर परीक्षण अप्वयेकीगु

येँ (नेपालभाषा टाइम्स) – स्वनिगलय् कोरोना भाइरसया संक्रमण अप्वया वयेवं पीसीआर परीक्षण यायेगु अप्वयेकागु खँ सरकारी अधिकारीतय्सं धाःगु दु। येँ वंगु असार १ गतेनिसें लकडाउन छ्वासुकूगु खःसा वयां लिपा स्वनिगलय् नं संक्रमण जूपिनिगु ल्याः अप्वयावःगु खः ।

स्वास्थ्य मन्त्रालयया अधिकारीतय् कथं स्वनिगलय् संक्रमण समूदाय दुने न्यनावन धाःसा ‘ग्वानाच्वंगु बुलुमि’ थें जुइफइगु जूगुलिं परीक्षणया दायरा अप्वयेकागु खँ धाःगु दु। वंगु असार ९ गते तक स्वनिगलय् संक्रमण जूपिं ६३ म्ह जक दुगु खःसा आः उगु ल्याः अप्वयाः २३३ थ्यंगु दु ।

थुकिया लिसें स्वनिगलय् पिसीआर परीक्षण अप्वयेके माःगु माग तच्वया वःगु खः । स्वास्थ्य मन्त्रालयया प्रवक्ता डा. जागेश्वर गौतमया कथं भिडभाड अप्व जुइगु थासय् संक्रमण न्यनेफइगु जोखिम उच्च जूगुलिं येँय् थप सर्तकता नालेमाः । वय्कलं धयादीगु दु, ‘देय्या मुक्कं जनसंख्या खुब्वया छब्व स्वनिगलय् च्वनाच्वंगु दु। थन आर्थिक गतिविधि नं अप्वः दुगुलिं जोखिम नं अप्वः दु ।’

वय्कःया कथं आः देय्न्यंकं न्हिं ४५ हजार पीसीआर परीक्षण यायेगु कथं ज्या न्ह्याकूगु दुसा उकी मध्ये २५ हजार पिसीआर येँय् यायेगु तयारी जुयाच्वंगु दु। वय्कःया कथं येँय् ज्याथजिथिपिं व दीर्घल्वगि नं अप्वः दुगुलिं संक्रमण न्यनावन धाःसा उपिं तसकं जोखिमय् लाइ । नेपालय् म्हिगः तक कोराना भाइरस संक्रमणया कारणं सीपिनिगु ल्याः ३८ म्ह थ्यंगु दु ।

सम्बन्धित बुखँ

LEAVE YOUR COMMENTS