येँ व मध्यपुर नगरप्रमुखपाखें किपूया लाय्कूया स्थलगत अवलोकन

किपू- थनया ऐतिहासिक लाय्कू (दरवार) पुनःनिर्माण यायेगु सन्दर्भय् थीथी स्थानीय तहया प्रमुखयात स्थलगत अवलोकन याकेगु ज्या जूगु दु । थनया ऐतिहासिक दरवार पुनःनिर्माण यायेगु सन्दर्भय् येँ महानगरपालिका प्रमुख विद्यासुन्दर शाक्य व मध्यपुर थिमि नगरपालिका प्रमुख मदनसुन्दर श्रेष्ठयात लाय्कूया स्थलगत अवलोकन याकूगु खः ।
येँ महानगर प्रमुख शाक्य, मध्यपुर थिमिया प्रमुख श्रेष्ठ, येँ जिल्ला समन्वय समितिया प्रमुख शिवसुन्दर राजवैद्यं किपूया लाय्कू दुगु धयातःगु थाय्या स्थलगत अवलोकन यानादीगु खः ।

लाय्कू लागा अवलोकन यायेत झायादीपिं नगरप्रमुखपिंत किपू नगरपालिकाया प्रमुख रमेश महर्जन, उपप्रमुख सरस्वति खड्कां अवलोकन याकादीगु खःसा १ वडाअध्यक्ष हर्ष महर्जनं लसकुस यानादीगु खः ।

किपू नगरपालिकां छुं ई न्ह्यः जक वडा नं. १ स्थित लाय्कू लागा (थौंकन्हय् १वडा ज्याकू दुगु परिसर) य् किपूया लाय्कू दुगु धइगु बारे तथ्य प्रमाण पेश यायेत धासें सार्वजनिक रुपं सुचं जारी याःगु खःसा वयांलिपा स्थानीय अभियन्तातय्सं दसि प्रमाण सहित किपू नगरपालिकाया प्रमुख रमेश महर्जनयात ज्ञापन पौ तकं लःल्हाःगु खः।

थ्व हे झ्वलय् किपूया वडा नं. १, २ व १० य् लाःगु किपूया हे गौरवया योजनाकथं कयातःगु निर्माणाधीन कीर्तिपुर युद्ध स्मृति पार्कय् वृक्षारोपण नं याःगु खः । किपू नगरपालिका वडा नं. १० व लायन्स व लियो क्लब अफ काठमाडौं, ग्वसालय् जूगु वृक्षारोपणय् येँ महानगर प्रमुख शाक्य, मध्यपुर थिमि नगर प्रमुख श्रेष्ठ, येँ जिससया प्रमुख राजवैद्य, किपू नगर प्रमुख महर्जन, उपप्रमुख खड्कालिसें किपूया वडाअध्यक्षपिं हर्ष महर्जन, रमेशमान डंगोल, राजेन्द्र महर्जन, न्हुछेबहादुर महर्जन, अमन महर्जन, प्रमुख

प्रशासकीय अधिकृत कृष्णप्रसाद सापकोटालिसें मेपिं जनप्रतिनिधि व स्थानीतय्सं वृक्षारोपण यानादीगु खः ।