सिक्किम नेवाः गुथियात सुदर्शन–कपिला सिरपाः

येँ- झी पुचः विराटनगरं प्रत्येक निदँय् छक्वः लःल्हाना वयाच्वंगु ‘सुदर्शन–कपिला सिरपाः’ थुगुसी सिक्किम नेवाः गुथि, गान्तोकयात लःल्हाःगु दु । पुचःया ग्वसालय् सुदर्शन कपिला ट्रष्टपाखें लःल्हाना वयाच्वंगु उगु सिरपाः नेवाः जाति, भाषा, कला, संस्कृति च्वन्ह्याकेगुलिसें उकिया संरक्षण, विकास यायेगु ज्याय् गुथिं बिया वयाच्वंगु योगदानया कदर यासें उगु सिरपाः लःल्हाःगु खः।

वंगु शुक्रवाः विराटनगरय् जूगु छगू तःजिगु ज्याझ्वःया दथुइ नेपाःपाखें झायादीम्ह मूपाहां प्रदेश नं. १या मुख्यमन्त्री राजेन्द्रकुमार राईं सिक्किम नेवाः गुथिया नायः निर्मलकुमार प्रधानयात निगू लख तका दांलिसें सम्मान पत्र लःल्हानादीगु खः ।

भारतीय प्रान्तय् च्वनाः नं निगू दशक न्ह्यवंंनिसें थःगु भाषा, कला, साहित्य, संस्कृतिलिसें पहिचानया संरक्षण यायेगलिइ गुथिं म्हिता वयाच्वंगु योगदानया कदर यासें उगु सिरपाः लःल्हाःगु खः । वंगु नीन्यादँ न्ह्यवनिसें क्रियाशील गुथिं नेवाः जाति, भाषा, कला, संस्कृतिया संरक्षण यायेगु ल्याखं थीथी जात्रा, पर्व हनेगु नापं सिक्किम जिल्लान्यंकं न्यंकेगु ज्याय् विशेष योगदान बिया वयाच्वंगु दु ।

ज्याझ्वलय् नवासें मुख्यमन्त्री राईं नेवाः समुदाय भाय्या माध्यमं देय्या हरेक क्षेत्रय् थःगु समुदायलिसे तसकं क्वातुगु सम्बन्ध दुगु धासें भाय्या संरक्षण, संवद्र्धनया यायेमाःगु खँय् बः बियादिल ।

गुथिया नायः प्रधानं सिक्किम सरकारं नेपालभाषा मान्यता बिउगु नापं भाय् संरक्षणया निंतिं नं प्रतिवद्ध दुगु जानकारी बियादिल ।
ज्याझ्वलय् सिक्किम सरकारया पर्यटन व संस्कृतिमन्त्री खिनु लिङ्वा लिम्बु, सिरपाःया दाता सुदर्शन श्रेष्ठ, झी पुचःया नायः हरिबहादुर श्रेष्ठ, मूछ्याञ्जे सुरेशलाल श्रेष्ठ, सदस्य सचिव भविष श्रेष्ठ, नेवाः मिसा दबूया नायः रश्मिला प्रजापतिं नं थःथःगु नुगःखँ तयादीगु खः ।

नेपालभाषा संरक्षण, प्रवद्र्धन व संवद्र्धन यायेगु ज्याय् विशेष योगदान बियादीपिं व्यक्ति व खलः, पुचःयात बीगु ल्याखं सुदर्शन श्रेष्ठ व कपिला श्रेष्ठं स्वनादीगु २० गू लखया अक्षया कोषपाखें निदँय् छक्वः थुगु सिरपाः बीगु याना वयाच्वंगु दु ।