ने. सं. ११४६ सिल्लागा अष्टमी -

सरकारय् संघीयता विरोधीत

येँ (नेपालभाषा टाइम्स)- प्रधानमन्त्री पुष्पकमल दाहालया नेतृत्वय् गठन जूगु वर्तमान सरकार स्वन्हु मदुनिवं गाक्कं आलोचित जूगु दु । खास यानाः उपप्रधान एवं गृहमन्त्री जूम्ह रवि लामिछानेयात सरकारय् हःगु खँय् आपालं टिकाटिप्पणी जूगु दु ।

लामिछानेया नागरिकतासम्बन्धी मुद्दा सर्वोच्चय् विचाराधीन जुयाच्वंगु ला द हे दु, उकिया लिसे लिसें वय्कः छम्ह संघीयता विरोधी मनू जूगु कारणं दाहाल थेंज्याःम्ह नेपालय् संघीयता हःम्ह मनुखं थःगु सरकारय् वयात छाय् हल धइगु न्ह्यसः नं पिहां वःगु दु ।

लुमंकेबहः जू, लामिछानें नेपाःया लागिं प्रदेश आवश्यक मजू धासें थुकियात खारेज यायेमाःगु माग याना वयाच्वंगु दु । संघीयता विरुद्ध वय्कलं सार्वजनिक रुपं तकं खँ तयेगु यानाच्वंगु दु । वंगु आम चुनावय् नं वय्कलं प्रतिनिधिसभाय् जक मतदान यानाः प्रदेशसभाय् मतदान हे मयाःगु खः । थ्व ल्याखं वय्कः वर्तमान संविधा विरोधी नं खः । संघीयता विरोधी मनूयात दाहाल थेंज्याःम्ह नेपालय् संघीय व्यवस्था लागू याकेगु लागिं जनयुद्ध याःम्ह नेतां छाय् थःगु सरकारय् थाय् बिल धइगु न्ह्यसः पिहां वःगु दु ।

वंगु चुनावय् लामिछानेया पार्टीं थुलिमछि सिट त्याकूगु हे संघीय प्रणालीया लागिं छगू हाथ्या खः धकाः चिउताः प्वंकाच्वंगु इलय् थःत संघीय प्रणालीया प्रणेता हे खः धकाः दावी याइम्ह दाहालं थःगु सरकारय् हयाः उपप्रधानमन्त्री थेंज्याःगु पदय् स्थान बिउगुलिं दाहालया सैद्धान्तिक निष्ठाय् नं न्ह्यसः ब्वलंगु दु ।

मेखे थीथी पार्टीया वरिष्ठपिं नेतातय्त ब्वः बियाः चुनाव त्याका वःम्ह लामिछाने न्हापांगु चरणय् हे सरकारय् दुहां वन धकाः वय्कःया समर्थकतय्सं नं कडा रुपं आलोचना याना हःगु दु । खास यानाः सामाजिक सञ्जालय् लामिछानेयात आलोचना यानाः वय्कःया थःहे समर्थकतय्सं कडा भासं च्वयेगु याना हयाच्वंगु दु ।

नागरिकताबारे पुस २२ य् सुनुवाइ
उपप्रधानमन्त्री एवं गृह मन्त्री रवि लामिछानेया नागरिकता सम्बन्धी मुद्दाय् पुस २२ गते सर्वोच्च अदालतय् सुनुवाइ याइगु जूगु दु । लामिछाने विरुद्ध कीर्ति नागरिकता सम्बन्धी मुद्दा लानाच्वंगु जुयाः वय्कःयात सांसद पदया शपथ ग्रहण याके मजिउ धइगु माग यासें रविराज बसौलां सर्वोच्च अदालतय् रिट तयातःगुु खः । उगु रिटय् अन्तरिम आदेश जारी यायेमाःगु खः लाकि मखु धकाः फैसला यायेत थ्व सुनुवाइ जुइत्यंगु खः ।

वय्कलं अमेरिकी नागरिकता काःगु इलय् नेपाली नागरिकता खारेज मयाःगु व लिपा अमेरिकी नागरिकता त्याग यायेधुंकाः न्हूगु नेपाली नागरिकता मकाःगु लिसें पुलांगु हे नागरिकता क्यनाः निर्वाचन आयोगय् उम्मेदवारी बिउगु जुयाः वय्कःयात सांसदत तक नं दयेके मजिउ धकाः थ्व रिट लाःगु खः । थुकी वय्कः कसुरदार खनेदत धाःसा वय्कःया सांसद पद तकं खारेज जुइफु धाःगु दु ।