जनजाति पाखें मुख्यमन्त्री डोरमणि पौडेलयात ज्ञापन पौ

येँ – नेपाल आदिवासी जनजाति महासंघ नेवाः ताम्सालिङ प्रदेश नम्बर ३ समन्वय परिषदं प्रदेशया मुख्यमन्त्री डोरमणि पौडेलयात ज्ञापन पौ लःल्हाःगु दु ।महासंघया प्रदेश संयोजक काजिमान थिङ तामाङया नेतृत्वय् वंगु पुचलं सोमवाः मुख्यमन्त्री पौडेलयात थीथी माग तयाः ज्ञापन पौ लःल्हाःगु खः ।

आदिवासी जनजातिया आत्मनिर्णित विकासया आकांक्षा अनुरुप आदिवासी जनजातीमैत्री विकासया नीति व ज्याझ्वःत संघया १५ क्वःगु पंचवर्षीय योजना व प्रदेशया नीति, योजना व ज्याझ्वलय् समावेश यायेत माग यासें महासंघ नेवाः ताम्सालिङ समन्वय परिषदं २० बुँदे ज्ञापन पौ लःल्हाःगु खः ।

तथ्यांक, समावेशीकरण, सामाजिक सांस्कृतिक विविधता, गरिबी निवारण व असमानता न्यूनीकरण, श्रम व रोजगारी, सभ्य व न्यायपूर्ण समाज, सामाजिक क्षेत्र, स्वास्थ्य व पोषण, पूर्वाधार क्षेत्र लगायतय् आदिवासी जनजातीमैत्री विकासया नीति व ज्याझ्वः हयेत महासंघं संघीय व प्रदेश सरकारयात ध्यानाकर्षण याकूगु खः ।

पुचलय् नेपाल आदिवासी जनजाती महासंघया मकवानपुर सहसचिव जंगबहादुर गुरुङ, नेपाल आदिवासी जनजाती पत्रकार महासंघया मकवानपुर न्वकू अशोकसुजन श्रेष्ठ, प्रदेश पार्षद दिलबहादुर लामा लगायतया सहभागिता दूगु खः ।