गोकर्णय् ३७ दँ लिपा देवीप्याखं

येँ – लिच्छवी जुजु मानदेवया पालय् शुरु जूगु धयातःगु छगू प्याखं गोकर्णय् क्यनेज्या जुयाच्वंगु दु । उगु देवीप्याखं करिब स्वंगू दशक लिपा हाकनं क्यनेगु ज्या जूगु खः ।जुजु मानदेवया पालंनिसें प्रचलनय् वःगु धयातःगु ऐतिहासिक देवीप्याखं ३७ दँ लिपा गोकर्णय् प्रदर्शन याःगु खः । मोहनिया चालंकुन्हुनिसें प्रदर्शन जुइगु थ्व प्याखं वइगु माघ मसान्ततक थीथी नखःचखःया इलय् नं क्यनेगु ज्या न्ह्यानाच्वनी ।

२०३८ सालतक क्यनाच्वंगु खःसां लिपा वनाः प्याखं क्यनेत माःगु स्रोत व कलाकारया अभाव जुइवं बन्द जुयाच्वंगु खः । न्यागूगु शताब्दीया इलय् जुजु मानदेवया पालंनिसें क्यना वयाच्वंगु थ्व प्याखं २०३८ सालय्तक प्याखं क्यनेत कलाकारया रुपय् सक्रिय जुया च्वनादीम्ह ज्ञानबहादुर श्रेष्ठं (७०) न्हू पुस्तायात प्याखं स्यनादीवं ३७ दँ लिपा थुगु प्याखं हाकनं क्यनेगु तयारी न्ह्याःगु खः ।

वइगु माघ मसान्ततक थीथी नखःचखःया इलय् प्याखं क्यनेगु तयारीकथं वइगु कात्तिक १७ गते शनिवाः कान्तिभैरव देगः परिसरय् प्याखं क्यनेगु तयारी जुयाच्वंगु दु । थीथी देवीया स्वरुपय् थ्व प्याखं क्यनेगु याइ । थौं स्वयां नीन्यादँ न्ह्यःतक मोहनिया इलय् ख्वपया नवदुर्गा प्याखं नं गोकर्णय् हयाः क्यनेगु यानाच्वंगु खः ।

नीन्यादँ न्ह्यः बन्द जूगु थ्व प्याखं नं आः वयाः हाकनं क्यनेगु कथं तयारी जुयाच्वंगु गोकर्णेश्वर नगरपालिका वडा नं. ४ या वडा अध्यक्ष श्रीकुमार श्रेष्ठं कनादीगु दु । प्याखं क्यनेगु निंतिं न्हू पुस्ता नं तसकं उत्साहपूर्वक लगे जुयाच्वंगु वय्कलं धयादिल ।

सम्बन्धित बुखँ

LEAVE YOUR COMMENTS