चित्लाङय् कात्तिक प्याखं

नेपालभाषा टाइम्स
११४० कौलागा चौथी
- संस्कृति
किपा-निर्मल बलामी / थाहा टाइम्स

येँ (नेपालभाषा टाइम्स) – मकवानपुर जिल्लाया नेवाः बस्ती चित्लाङय् ऐतिहासिक कात्ति प्याखं क्यंगु दु । मकवानपुरया थाहा नगरपालिका अन्तर्गतया चित्लाङय् स्थानीय बलामि जातिया प्रचलित ऐतिहासिक कात्ति प्याखं कतिं पुन्हिनिसें क्यंगु खः । मोहनि नखः धुनेवं कतिंपुन्हिनिसें शुरु जुइगु थ्व प्याखं स्वन्हुतक चान्हिसिया इलय् क्यनेगु याइ । थन न्ह्यब्वइगु कात्ति प्याखनय् थीथी पौराणिक बाखंया स्वानाच्वंगु धइगु मान्यता दु ।

प्याखं क्यने स्वयां छन्हु न्ह्यः स्थानीय चैत्य दबुलिइ नं थ्व प्याखं क्यनेगु याना वयाच्वंगु दु। कतिंपुन्हि छन्हु न्ह्यः स्वच्छन्द भैरवया रथ भैरवस्थानय् यंकेवं कात्ति प्याखंया चहलपहललिसें दबुलिइ प्याखं शुरु जुइ । थन कात्ति प्याखं क्यनीगु इलय् प्याखंया मुख्य गुरु रामकृष्ण बलामिया छेँय् छगू विधिवत पुजा यानाः गुम्ह देवीया प्याखं पिथनेगु याइगु खः । चित्लाङया कात्ति प्याखं स्वयेत येँ, यल, मार्खु, फाखेल लगायतया थास आपालं मनूत वयेगु याः । थुगुसी धाःसा कोरोना संक्रमणया कारणं सीमित स्थानीयतय् जक उपस्थिति दुगु खः ।