वा वयाः बिस्काः जात्रा प्रभावित

ख्वप –  धुवांधू वा वयाः थुगुसी बिस्काः जात्राया फुक्कं धइथें ज्याझ्वः प्रभावित जूवंगु दु । वा वःगु हे कारणं इलय् खः ल्वाकेगु जात्रा याये मफुत । अझ छन्हु न्ह्यः जक मखुगु जूसा थुगुसी बाराहीया तिंप्वाः जात्रा हे प्रभावित जुइगु खः । तिंप्वाः जात्रा यःसिं थनेकथं याइगु खः। चैत ३० गते बहनी यःसिं थनेवं बाराही द्यःया थासं पीठय् खतय् तयाः बाराही द्यःयात बिज्याकीगु खः ।

व इलय् तां मवँसे खुसिं वनीगु खः । द्वलंद्वः मनूत धुं धुपाँय् च्याकाः वंगु उगु जात्रा क्वचाःगु नीप्यघौ हे मजाःबलय् वंगु असार २७÷२८ गते थेंज्याःगु हे तसकं खुसिबाः वःगु कारणं खुसि छियाः द्यः यंकेगु सम्भावना हे मदयावंगु खः । अथेहे वा तसकं वःगु कारणं यःसिं थने धुंकाः भैलः खः व नकिंजुया खः धयातःम्ह भद्रकालीया खः ल्वाकेगु जात्रा नं मजुल ।

गःहितिइ निगुलिं खः सालाः हयाकथं भैरव व भद्रकालीया समागम कथं खः ल्वाकीगु खः । तर वा वःगुलिं १ गते खाइसंल्हू कुन्हु यायेमाःगु जात्रा वयां सतिकुन्हु २ गते बहनी तकं जुइ मफुत । २ गते भैलःखः जक गःहितिइ साला हयेफुगु खःसा नकिंजु खः यःसिं ख्यलय् हे लानाच्वंगु इलय् तसकं प्वं वा गाःगुलिं मनूत जात्रा हे त्वःता वंगु खः ।

३ गते जक नकिंजु खः सालाः खः जात्रा क्वचायेकूगु दु । आः बल्ल भैलः खतय् च्वंम्ह भैलःखःयात लाकौलाछेँया द्यःछेँय् तयेयंकूगु दु । द्यः अथें भैलःखतय् तुं लाःगुलिं थुगुसी न्हूम्ह बेताल भैरव पलिस्था यानादीम्ह नारायणप्रसाद खाइतु स्वन्हु तक द्यः पियाः द्यनेमाःगु स्थिति वःगु खः । भैलःखः न्हापांगु दिं चैत २७ गते नं थाते लाके मफयाः इनाचोय् हे द्यः पियाः द्यनेमाःगु खः ।

सातिकुन्हु जक सुथय् ९ बजे गःहितिइ थाते लाकूगु खः । भैलःखः सालेगु झ्वलय् वा वःगु कारणं भैलः खःया चक्का च्वनीगु लँय् प्लाष्टिक व फोहरया द्वँ थानाच्वंगु अवस्था वःगु खः । तसकं वा वःगु कारणं महालक्ष्मी व महाकालीया खः जात्रा नं प्रभावित जूगु खः । बिस्काः जात्रां थथे तसकं वा वयाः थीथी जात्रा प्रभावित जूगुलिं थुगुसी द्यः सगं बीगु दिन कुन्हु छुं नं त्वालं द्यःयात ब्व छायेगु तकं मयासें जात्रा क्वचाःगु दु ।

 

सम्बन्धित बुखँ

LEAVE YOUR COMMENTS