थौं मिसापिंसं जक जनबहाःद्यःया रथ सालीगु

येँ (नेपालभाषा टाइम्स)- जनबहाः द्यःया जात्रा थनिंनिसें शुरु जुइगु जूगु दु । थौं थनया जमःस्थित स्वधाःहितिं रथ सालाः थ्व जात्रा न्यायेकी । थौं जात्राया न्हापांगु न्हि मिसापिंसं जक छत्वाःचा रथ सालाः जात्रा न्ह्याकेगु तयारी जुयाच्वंगु दु । थुकी येँ मनपाया उपमेयर सुनिता डंगोल नं सहभागी जुयादीगु खँ सीदुगु दु । थ्व झ्वलय् जात्रा सम्बन्धी व्यवस्थापनया सम्पूर्ण ज्या क्वचाःगु खँ जनबहाःद्यः जात्रा व्यवस्थापन समितिं धाःगु दु ।

व्यवस्थापनया अन्तिम बैठक म्हिगः संस्कृति मन्त्रालयय् च्वंगु खः । बैठकया झ्वलय् संस्कृति मन्त्री सुदन किराँतीं थौं जुइगु रथ जात्राय् थः नं सहभागी जुयाः रथ सालेगु इच्छा प्वंकादीगु खः । येँ मनपाया मेयर बालेन साहया नं उपस्थिति दुगु उगु बैठकय् न्ववासें उपमेयर सुनिता डंगोलं जनबहाद्यःया जात्रा छगू शिक्षामूलक संस्कृति नं जूगु कारणं थ्व जात्रा जुइकुन्हु सार्वजनिक बिदाया व्यवस्था यायेमाःगु बिचाः नं तयादीगु खः ।

रथ दयेकेगु झ्वलय् म्हिगः मनूतय्सं हे घःमाः ल्ह्वनाः जमलय् तक हःगु खः । अथे हे आः रथय् नं द्यः खने दइ कथं नेवाः नुगःपाखें रथय् दुने मतया व्यवस्था याःगु दु ।