राष्ट्रपतिं पौडेलं न्हापांम्ह राष्ट्रपति व उपराष्ट्रपति नापलात

येँ (नेपालभाषा टाइम्स) – राष्ट्रपति राचन्द्र पौडेलं गणतन्त्र नेपाःया न्हापांम्ह राष्ट्रपति डा. रामवरण यादव व उपराष्ट्रपति परमानन्द झायात नापलानादीगु दु । राष्ट्रपति पौडेलं निम्हेसित म्हिगः शीतल निवासय् सःताः सुनसरीया देवानगञ्ज गाउँपालिकाया कप्तानगञ्ज लगायत तराई मधेशया थीथी जिल्लाय् खनेदुगु विषम परिस्थितियात कयाः सहलह यानादीगु खः । सहलहया झ्वलय् राष्ट्रपति पौडेलं उगु घटनायात कयाः चिन्ता प्वंकूसें सलंसः दँ निसे दयाच्वंगु सामाजिक, धार्मिक, जातीय सद्भाव, सहिष्णुता व राष्ट्रिय एकता कायम यायेत सकस्यां पहल यायेमाःगु खँ धयादीगु खः । न्हापांम्ह राष्ट्रपति डा. यादवं सरकारं थ्व विषम परिस्थितिइ फुक्कं राजनीतिक दल, नागरिक समाज, धार्मिक न्ह्यलुवा लिसे आम नागरिकया साथ कयाः समस्या ज्यंकेगु निंतिं थःगु क्षमता क्यनेमाःगु सुझाव बियादीगु खँ धाःगु दु ।